ე.წ. „კორტების სპეცოპერაციაზე“ რიგითი სპეცრაზმელი, ამავე საქმეზე ბრალდებული, მოწმე ალექსანდრე ციმაკურიძე დაიკითხა. მოწმემ დაადასტურა, რომ მას და მის ჯგუფს კახა ნაკანმა სამი ან ოთხი შეიარაღებული პირის დაკავება უბრძანათ.

„ჩვენ თუ ვიღაცის მოკვლა გვქონდა ნაბრძანები და თუ ჩვენ მკვლელები და ქილერები ვიყავით, მაშინ ის მესამე პირი რატომ არ მოვკალით?“ , - განაცხადა მოწმემ.

ალექსანდრე ციმაკურიძემ ასევე დაადასტურა, რომ მანქანიდან მომდინარეობდა საფრთხე, მისთვის ასევე ცნობილი იყო, რომ მანქანაში მსხდომი პირები შეარაღებულები იყვნენ. ამას ადასტურებს ის გარემოება, რომ მან დაინახა, თუ როგორ გადმოუვარდა მაკაროვის სისტემის ცეცხლასროლი იარაღი უკან მჯდომ პირს.

მოწმის თქმით, მიუხედავად იმისა, რომ ნაკანისგან სპეცრაზმელებს ნაბრძანები ჰქონდათ პირთა დაკავება, მათ ადგილზე ხელბორკილი მანქანში მყოფი არცერთი პირისთვის არ დაუდიათ. ციმაკურიძემ ასევე აღნიშნა, რომ ინტენსიური სროლები 5 წუთამდე გრძელდებოდა, მაშინ როდესაც ჯგუფის ხელმძღვანელმა სანიკიძემ, წინა სასამართლო პროცესზე, აღნიშნა, რომ ინტენსიური სროლები 15 წამამდე გაგრძელდა.