ოზურგეთის რაიონულმა სასამართლომ (მოსამართლე მარინა კიკნაძე), გამოძიების მიერ ფულის გამოძალვაში ბრალდებულ ოზურგეთელ ახალგაზრდებს მამალაძეს, ქვეითაიას, ბორჩხაძესა და შეშელიძეს 4-4 და 5-5 წელი მიუსაჯა.

მოსამართლემ სრულად გაითვალისწინა პროკურორის (შოთა ჩხაიძე) პოზიცია და ოთხივე მათგანი დამნაშავედ ცნო.

თავის მხრივ, სასამართლოს გადაწყვეტილებას უსამართლოს უწოდებენ ბრალდებულის ახლობლები და ადვოკატები, რომლებიც აცხადებენ, რომ გადაწყვეტილებას სააპელაციო სასამართლოში გაასაჩივრებენ.

ისინი აცხადებენ, რომ მოსამართლე პროცესის დროს, რომელიც 10 თვის განმავლობაში მიმდინარეობდა, მთლიანად პოლიციისა და პროკურატურის ზეწოლის ქვეშ იმყოფებოდა და გადაწყვეტილებაც გამოძიების კარნახით მიიღო.

ახალგაზრდების ახლობლები აცხადებენ, რომ საქმე, რომელიც თითქოს თანხის გამოძალვას ეხება, თავიდან ბოლომდე შეთითხნილია და თავად მომხდარი ფაქტი პოლიციის მიერაა პროვოცირებული.

ქალაქ ოზურგეთში მცხოვრებ ნოშრევან ქვეითაიას, შალვა მამალაძეს, ბესო ბორჩხაძესა და გელა შეშელიძეს გამოძიება ოზურგეთის მუნიციპალიტეტის სოფელ გომში მცხოვრები ძმების - ნიკოლოზ და დავით აბაშმაძეებისადმი თანხის გამოძალვაში ადანაშაულებდა.

ინცინდენტი გასულ წელს, ქალაქ ოზურგეთში მოხდა, როცა მათივე ინფორმაციით, გასამართლებულ ქვეითაიას სახლში პოლიციამ, თანხის გამოძალვის ფაქტი აღკვეთა. პოლიცია ამტკიცებს, რომ ქვეითაია, რამდენიმე პირთან ერთად, თანხას, ძმებ აბაშმაძეებს, საკუთარ საცხოვრებელ სახლში სძალავდა.

თუმცა, ბრალდებულის მხარე აცხადებს, რომ ქვეითაიათან, სახლში მისული, ძმები აბაშმაძეები, პოლიციის დავალებას ასრულებდნენ და მასთან მიგზავნილები იყვნენ პროვოკაციისათვის, რაც გამოუვიდათ კიდეც.