ე.წ. კორტების სპეცოპერაციის საქმის მოწმის ურთიერთგამომრიცხავი ჩვენება სასამართლოზე

სამართალი - 19:20, 24 Jul, 2015

2388

ე.წ. კორტების სპეცოპერაციის საქმეზე დღეს გამართულ სასამართლო პროცესზე სპეცრაზმელები დაიკითხნენ.

ერთ-ერთმა მოწმე ალექსანდრე სანიკიძემ განაცხადა, რომ მას ფირცხალავას ბრძანება არ შეუსრულებია და ცეცხლი მხოლოდ იმიტომ გახსნა, რომ ნაკანმა გაისროლა. „ მე ირაკლი ფირცხალავას ბრძანებას არ დავემორჩილე, უბრალოდ მანქანის შეჩერების მიზნით ვესროლე საბურავში.“- განაცხადა სანიკიძემ და აღნიშნა რომ აღნიშნული ქმედება არა ირაკლი ფირცხალავას, არამედ კახა ნაკანის ქმედების შემდეგ განახორციელა.

ამის შემდეგ, სანიკიძემ სასამართლოზე ნაკანის მიერ დასმულ რამდენიმე კითხვასაც უპასუხა, სადაც სანიკიძე ამბობს, რომ მას ძირს დაგდებული იარაღისთვის ხელი არ უხლია.

კახა ნაკანი: რამდენ ხანში დასრულდა სპეცოპერაცია, სროლებიდან მანქანის შეჯახებამდე?

ალექსანდრე სანიკიძე: 15 წამში

კახა ნაკანი: როდესაც მანქანას მიუახლოვდი და გადმოიყვანე დაჭრილი პირი, სხვა ვინმე შველას ითხოვდა?

ალექსანდრე სანიკიძე: არა

კახა ნაკანი: ძირს დავარდნილი იარაღის მიმართ, რამე მოქმედება განახორციელე?

ალექსანდრე სანიკიძე: არა, მე ხელი არ მიხლია.

ე.წ. კორტების სპეცოპერაციის საქმეზე ძალოვანი უწყების ყოფილი მაღალჩინოსნები ირაკლი ფირცხალავა, კახა ნაკანი, ლევან ბეროძე, გიორგი ცააძე და გრიგოლ კვინიკაძე არიან ბრალდებულები.

დღეს სასამართლოზე რიგითი სპეცრაზმელები დაიკითხნენ, რომლებმაც დახურულ სასამართლო სხდომაზე, რამდენიმე დღის წინ სპეცოპერაციის ხელმძღვანელი პირების მამხილებელი ჩვენება მისცეს. რიგით სპეცრაზმელებს, განზრახ მკვლელობის ბრალდება აქვს წარდგენილი.