საქართველოს რეგიონული განვითარებისა და ინფრასტრუქტურის სამინისტროს საქართველოს გაერთიანებული წყალმომარაგების კომპანიამ და მუნიციპალური განვითარების ფონდმა ევროპის საინვესტიციო ბანკის დაფინანსებით თეთრწყაროში წყალმომარაგების სისტემის რეაბილიტაცია დაიწყეს. პროექტის ღირებულება 2 მილიონ ლარზე მეტია. მისი დასრულების შემდეგ თეთრიწყაროში მცხოვრები 2000 ოჯახი გაუმჯობესებული წყალმომარაგებით ისარგებლებს, ამასთანავე შემცირდება წყლის დანაკარგებიც. მიმდინარე სამუშაოები დღეს საქართველოს გაერთიანებული წყალმომარაგების კომპანიის დირექტორმა, ნიკოლოზ ქიზიყურაშვილმა, ადგილობრივი ხელისუფლების წარმომადგენლებთან ერთად დაათვალიერა და მშენებლობის ხარისხი შეამოწმა.

წყლის ინფრასტრუქტურის რეაბილიტაციის შედეგად თეთრიწყაროს მუნიციპალიტეტში მცხოვრებ 8000-ზე მეტ ადამიანს წყლის გრაფიკისა და წყლის ხარისხის პრობლემა მოუგვარდება. შემცირდება წყლის დანაკარგებიც. პროექტის ფარგლებში მოხდება: ქალაქის შიდა გამანაწილებელი ქსელების ამორტიზებული მონაკვეთების რეაბილიტაცია, წყალსადენის ჭებითა და ჩამკეტ-მარეგულირებელი არმატურით აღჭურვა, არსებული საქლორატორო შენობა-ნაგებობის რეაბილიტაცია და რეზერვუარების დამაკავშირებელი მილსადენის რეაბილიტაცია. პროექტი, რომლის ფარგლებშიც 30 ადამიანი დასაქმდა, 2016 წლის დასაწყისში დასრულდება.