სილვიო ბერლუსკონი რუსეთის ეკონომიკის მინისტრი ხდება?

მსოფლიო - 16:23, 23 Jul, 2015

2127

იტალიის ყოფილი პრემიერ-მინისტრი, სილვიო ბერლუსკონი ხელისუფლებაში ბრუნდება, მაგრამ არა იტალიის, არამედ რუსეთის მთავრობაში.

როგორც იტალიური გამოცემა La Stampa იუწყება, ვლადიმერ პუტინმა ბერლუსკონის რუსეთის მოქალაქეობა და ეკონომიკის მინისტრობა შესთავაზა.

„ჩემი მომავალი? გავხდე ჩემი მეგობრის მინისტრი. აბა დაფიქრდით, იტალიაში მე მარგინალიზებული ვარ, ხოლო პუტინმა მითხრა, რომ მზად არის რუსეთის მოქალაქეობა მომანიჭოს და ეკონომიკის სამინისტრო ჩამაბაროს“ - განაცხადა ბერლუსკონიმ.

La Stampa-ს ჟურნალისტის მასიმო გრამელინის თქმით, სავარაუდოდ, ბერლუსკონის ეს კომენტარი სერიოზულად არ გაუკეთებია, თუმცა სავსებით შესაძლებელია, ჭორები იტალიის ექსპრემიერისთვის რუსეთის მოქალაქეობის მიღების შესახებ სიმართლე აღმოჩნდეს.

როგორც ცნობილია, პუტინი და ბერლუსკონი მეგობრები არიან. რუსეთის პრეზიდენტი იტალიაში ვიზიტის დროს ყოველთვის ცდილობს გამონახოს დრო ბერლუსკონის მოსანახულებლად. 11 ივნისს, კი იტალიის ყოფილი პრემიერი აეროპორტში მხოლოდ იმიტომ მივიდა, რომ პუტინი ენახა, რომელმაც იტალიაში ოფიციალური ვიზიტით ყოფნისას დატვირთული გრაფიკის გამო ბერლუსკონთან შეხვედრა ვერ მოახერხა.