სამმა პატიმარმა პირი ამოიკერა - პროტესტი ქუთაისის ციხეში

სამართალი - 15:10, 20 Jul, 2015

957

ამ წუთებში, ქუთაისის #2-ე საპყრობილის წინ პატიმრების ოჯახების წევრები და ახლობლები აქციას მართავენ. რამდენიმე დღიანი შიმშილობის შემდეგ სამმა მსჯავრდებულმა დღეს პროტესტის უკიდურეს ფორმას მიმართა და პირი ამოიკერა, ორი პატიმარი კი მშრალ შიმშილობას განაგრძობს.

როგორც „ნიუპოსტს“ დაკავებულთა ადვოკატმა ბაჩუკი ყურაშვილმა განუცხადა, პატიმრებმა პროტესტის უკიდურეს ფორმას მას შემდეგ მიმართეს, რაც შიმშილობის დროს მათი მდგომარეობით არც სახალხო დამცველი და არც არასამთავრობო ორგანიზაციები არ დაინტერესდნენ. პატიმრები მათი საქმის გადახედვას და ხელახლა გამოძიებას ითხოვენ. საპატიმრო დაწესებულების ექიმის განცხადებით, პატიმრების მდგომარეობა ამ დროისთვის უკიდურესად მძიმეა.

დაკავებულთა ოჯახის წევრები „ნიუპოსტთან“ საუბრისას აცხადებენ, რომ პატიმრები უდანაშაულოები არიან და არავითარი დაპირისპირება სამართალდამცავებთან არ მომხდარა. პატიმრების ოჯახის წევრები ასევე განმარტავენ, რომ ამ ადამიანების დაკავება მას შემდეგ მოხდა, რაც ადმინისტრაციული კოდექსით გათვალისწინებული სასჯელისთვის დაკავებულმა თემურ გაბუნიამ, რომლის გაქცევის ხელშეწყობისთვისაც ეს ადამიანები არიან გასამართლებულები, პოლიციის შენობა მანამდე დატოვა, სანამ ამ ადამიანებს დააკავებდნენ, შესაბამისად გაქცევისთვის ხელშეწყობა ვერანაირად ვერ მოხდებოდა.

პატიმრების ოჯახის წევრები პარლამენტის შენობისკენ მსვლელობას გეგმავენ, სადაც აქციას გამართავას გეგმავენ. ისინი აცხადებენ, რომ შეუერთდებიან პატიმრების პროტესტს და პარლამენტის შენობის წინ შიმშილობას გამოაცხადებენ. პატიმრების ოჯახის წევრები ხელისუფლებას ამ საქმით დაინტერესებისკენ მოუწოდებენ.

მსჯავრდებულები, რომლებიც 17 ოქტომბერს დააკავეს, პატიმრის გაქცევის მიზნით პოლიციისთვის ხელის შეშლისთვის გაასამართლეს, სამ მათგანს 5 წლით, ხოლო ორს 3 წლით თავისუფლების აღკვეთა მიესაჯა.