დაპატიმრებული არიან, აჭარის ფინანსათა და ეკონომიკის მინისტრის ყოფილი მოადგილე თამაზ მღებრიშვილი და ამავე სამინისტროს საწარმოთა მართვის დეპარტამენტის ყოფილი უფროსი აბესალომ გურგენიძე.

ასევე ბრალდებულის სახით პასუხისგებაში იქნა მიცემული ორი პირი, შ.პ.ს. ,,ლემისე-კომპანის"" მფლობელი ლუხუმ კაპანაძე და სერგი კაკალაშვილი, რომლებიც ამჟამად იმყოფებიან მიმალვაში.

ფინანსთა სამინისტროს საგამოძიებო სამსახურის განცხადების თანახმად, გამოძიებამ დაადგინა, რომ სააქციო საზოგადოება ,,ბათუმის ქიმიურ ფარმაცევტული" ქარხნის დაუფლების მიზნით, რომლის 76%-ს ფლობდნენ სახელმწიფო ბრალდებულები კაპანაძე და კაკალაშვილი, დანაშაულებრივად გაურიგდნენ მღერბიშვილს და გურგენიძეს.

მათ ერთად შეიმუშავეს გეგმა, რომლის მიხედვითაც აღნიშნული კომპანია გაკოტრებულად გამოცხადდა, რის შემდეგაც ქარხნის საწესდებო კაპიტალში არსებული 4. 348.856 ლარის ღირებულების უძრავ-მოძრავი ქონება შ.პ.ს ,,ლემისე-კომპანიას" მილიონ 111 ათას ლარად გადაეცა. აღნიშნული ქმედებით კი სახელმწიფომ იზარალა 3. 233. 856 ლარი.

გამოძიების მსვლელობისას ასევე გამოიკვეთა სერგი კაკალაშვილისა და ლუხუმ კაპანაძის სხვა დანაშაულებრივი ქმედება. მათ ქონების გადამალვისა და კრედიტორის წინაშე ვალდებულებებისაგან თავის არიდების მიზნით, შ.პ.ს. ,,ბათოილს", რომლის მფლობელებიც თავად იყვნენ, დირექტორთან პაატა დათიშვილთან გააფორმეს რამდენიმე გარიგება და ,,ბათოილის" ქონება მათზე გადააფორმეს.

აღნიშნულის საფუძველზე საგამოძიებო სამსახურის თანამშრომლებმა პაატა დათიშვილი დააკავეს.

მიმდინარეობს გამოძიება საქართველოს სისხლის სამართის კოდექსის 332-ე მუხლის პირველი ნაწილით, 182-ე მუხლის მეორე და მესამე ნაწილებით, 205-ე მუხლის მეორე და მესამე ნაწილით, რაც ითვალისწინებს თავისუფლების აღკვეთას 6-დან 11 წლამდე ვადით.