,,მე მივესალმები იმას, რომ ჟურნალისტები თუ ჩვეულებრივი რიგითი ახალგაზრდები იქ ჩავიდნენ. ფაქტობრივად მათ გააკეთეს მთელი საქართველოს და უპირველეს ყოვლისა, ხელისუფლების გასაკეთებელი საქმე. ძალიან მოხარული ვარ, მართალია ამით პრობლემა არ გადაიჭრება, მაგრამ ასეთი სირცხვილისგან გარკვეულწილად გვიხსნეს, ეს მისასალმებელია. ფაქტია, რომ რუსებმა დადგეს ეს ბანერი, თვითონ წავიდნენ და ამით ერთგვარი ტესტი ჩაატარეს - არსებობს თუ არა ამ ტერიტორიაზე სახელმწიფო და მოსახლეობა. იმ მომენტში ის ბანერი დაცვის გარეშე იყო, მაგრამ მიუხედავად ამისა, ადგილობრივი თუ ცენტრალური ხელისუფლების წარმომადგენლებს, არცერთს აზრად არ მოსვლია, რომ უკანონო ბანერი, რომელსაც არც ჯარი და არავინ არ იცავდა, ელემენტარულად იქიდან მოეშორებინათ. აი, ეს გააკეთეს უბრალო მოქალაქეებმა, რაც ძალიან სასიამოვნოა. ეს იყო აუცილებელი და ამან მთელი მსოფლიოს ყურადღება გამოიწვია, "ევრონიუსში ," no comment_ შიც იყო კარგი კადრები ბანერის მოსპობის. ასე, რომ ამ საკითხის აქტუალიზაცია მოხდა, სიჩუმეში არ ჩაიარა და ამას დიდი მნიშვნელობა აქვს. ძალიან მადლობელი ვარ იმ ადამიანების, რომლებმაც ეს გააკეთეს“ - აღნიშნა თამარ ჩხეიძემ.

რაც შეეხება საქართველოს ხელისუფლების პოზიციას, თამარ ჩხეიძე მიიჩნევს, რომ გარდა იმისა, რომ ბანერის მოშორება ხელისუფლების წარმომადგენელთა გასაკეთებელი იყო, ამასთან ერთად, ხელისუფლებას ამის გამო უნდა შეექმნა საერთაშორისო სკანდალი:

,,ამის ნაცვლად ხელისუფლებამ რა გააკეთა - ჯერ ხმას არ იღებდნენ, სანამ არ ატყდა ხმაური და როცა უკვე გახმაურდა, მაგალითად, კალაძემ და მათ შორის სხვებმაც განაცხადეს, რომ ეს წინა ხელისუფლების ბრალი იყო, ამავე დროს განაცხადეს, რომ ეს არაფერი არ არის და რა მნიშვნელობა აქვს. კალაძემ ისიც კი დაუმატა, რა მოხდა, ჩვენ გვაქვს ნავთობსადენის ალტერნატიული გეგმა და გადავხედავთო... კალაძემ მოიპატიჟა რუსები შემდგომი აგრესიისთვის და დაამშვიდა, გადავწევთ არაუშავსო... ასევე ხიდაშელმა, თავდაცვის მინისტრმა განაცხადა, რომლის უშუალო კომპეტენციაში შედის ეს საკითხები, რომ განსაკუთრებული არაფერი არ მომხდარაო. დავით ბერძენიშვილმა, რომელიც ასევე ხელისუფლების წარმოამდგენელია, საერთოდ სიტყვასიტყვით გაიმეორა კარასისნი სიტყვები, რომ ეს ისედაც მათი კონტროლირებადი ტერიტორია იყო და არაფერი არ მომხდარა, ეს ყველაფერი სიცრუეაო“ - განაცხადა თამარ ჩხეიძემ.

მისივე თქმით, რატომ არ შეიძლება ქარრთული სამართლადამცავი ორგანოს მიერ დაცული იყო ის ტერიტორიები, სადაც შესაძლოა რუსებმა ახალი მიწები აითვისონ და რომელიც ქართული მხარის კონტროლირებად ტერიტორიაში შედის.

,,ჩემთვის გაუგებარია, იქ სადაც შეიძლება, რომ ახალი მიწები აითვისონ და სახნავ-სათესი წაართვან მოსახლეობას, რატომ არ შეიძლება ამ ადგილების დაცვა სამართლადამცავი ორგანოების მიერ, მე არ ვამბობ რომ ჯარი იდგეს. უბრალოდ სამართალდამცავებმა გააკონტროლონ ეს ტერიტორია, თუნდაც ბაქო-სუფსის ნავთობსადენის მილის მონაკვეთის დაცვის მიზნით, ასე უაპელაციოდ რომ არ შეეძლოთ მათ საოკუპაციო ზოლის გაზრდა“ - აცხადებს ყოფილი დისიდენტი.

რაც შეეხება კარასინი-აბაშიძის და რუსეთთან დიალოგის ალტერნატიული ფორმატის შექმნის საკითხს, თამარ ჩხეიძე ამბობს, რომ რუსეთთან დიალოგი თავისთავად მისაღებია, მაგრამ რუსეთმა უნდა იცოდეს, რომ ურთიერთობების ნორმალიზება საქართველოს ტერიტორიული მთლიანობის აღიარების გარეშე შეუძლებელია.

,,კარასინ-აბაშიძის ფორმატი ამ სიტუაციაში, რასაც რუსეთი აკეთებს, სხვადასხვა საკითხების განხილვით რაღაც ილუზიების შექმნა და იმის გაცხადება, რომ ძალიან წარმატებულია ეს ფორმატი, არის მიუღებელი. მსოფლიოს უქმნიან ილუზიებს, რომ საქართველო-რუსეთის ურთიერთობები უმჯობესდება. ეს თავისთავად ძალიან მავნებელია, როგორ შეიძლება გაუმჯობესებაზე საუბარი, როცა მცოცავი ანექსია გრძელდება. საერთოდ გაუმჯობესების ილუზიის შექმნა, სანამ ოკუპაცია გრძელდება, ეს ნიშნავს, რომ მსოფლიო შევაგუოთ. თუ შენ ეგუები, მსოფლიოს სხვა აღარაფერი რჩება, გარდა იმისა, რომ შეეგუოს. ამ მიწის პატრონი ჩვენ ვართ. ასეთი პრაქტიკა ძალიან მავნეა. მე ზოგადად რუსეთთან მოლაპარაკების წინააღმდეგი, რა ფორმითაც არ უნდა იყოს, არ ვარ, თუმცა რასაკვირველია, ჟენევის ფორმატი ამისთვის უფრო შესაფერისია, რადგან საერთაშორისო ძალები მონაწილეობენ. მაგრამ კარასინ-აბაშიძის ფორმატი არის ილუზიის შემქმნელი. ყველა მოლაპარაკებაზე მთავარი საგანი და მთავარი მესიჯი უნდა იყოს ის, რომ რუსეთი-საქართველოს ურთიერთობების ნორმალიზაცია შეუძლებელია საქართველოს ტერიტორიული მთლიანობის რუსეთისგან ცნობის გარეშე, დეოკუპაციის გარეშე. ეს უნდა გაიგოს რუსეთმა, რომ დეოკუპაციის გარეშე არ შეიძლება ურთიერთობის ნორმალიზაცია, ამაზე უნდა ვილაპარაკოთ“ - განაცხადა თამარ ჩხეიძემ.