"ე.წ. კორტების სპეცოპერაციის დროს უკანონოდ ისროლეს" - სპეცრაზმელებმა მამხილებელი ჩვენება მისცეს

სამართალი - 14:02, 15 Jul, 2015

2457

ე.წ. კორტების სპეცოპერაციის საქმის პროკურორის ინფორმაციით, რიგითმა სპეცრაზმელებმა ხელმძღვანელების მიმართ მამხილებელი ჩვენება მისცეს. როგორც ამირან გულუაშვილმა განაცხადა, სპეცრაზმელებმა აღიარეს, რომ ბოლო წუთამდე არ ფლობდნენ სპეცოპერაციის შესახებ ინფორმაციას.

„ბოლო წუთამდე რიგითი სპეცრაზმელებისთვის ისიც კი არ იყო ცნობილი, თუ რა ღონისძიებაში იღებდნენ ისინი მონაწილეობას. მათი გადაწყვეტილება ცეცხლის გახსნასთან დაკავშირებით მათი ხელმძღვანელი პირების მიერ მიღებულ ბრძანებას ემსახურება. სპეცრაზმელი, ისევე როგორც ნებისმიერი სხვა საჯარო მოხელე ვალდებულია ხელმძღვანელის დავალება შეასრულოს. თუმცა არც ერთი პირი არ არის ვალდებული, რომ უკანონო გადაწყვეტილება მიიღოს. მათ არ იცოდნენ რა სპეცოპერაციაში იღებდნენ მონაწილეობას. ბოლო სტადიაზე მოხდა მათი ინფორმირება. ბრძანება ხელმძღვანელობამ გასცა. ბრალდების მხარის პოზიციით, ვაზაგაშვილის მართვის ქვეშ მყოფი ავტომობილის მიმართულებით ცეცხლასასროლი იარაღიდან ნაწარმოები სროლები არ შეესაბამებოდა კანონიერ საფუძველს, რადგან იმ ავტომობილიდან საფრთხე არ მოდიოდა და არც ერთ პირს არ ჰქონდა უფლება გაეხსნა ცეცხლი ვაზაგაშვილის მართვის ქვეშ მყოფი ავტომობილისთვის“ - განაცხადა გულუაშვილმა.

საქალაქო სასამართლოში ე.წ. კორტების სპეცოპერაციის საქმეზე პროცესი 20 აგვისტოს განახლდება.