"ბარამიძე, მაჭავარიანი, გოგორიშვილი ზურა რასაც ეტყოდა ასრულებდნენ... ეხლა სააკაშვილის სიტყვას ასრულებენ"

სამართალი - 14:27, 14 Jul, 2015

3489

საქალაქო სასამართლოში დაკითხვისას ნინო ქადაგიძე-ჟვანიამ განაცხადა, რომ მეუღლის გარდაცვალების შემდეგ ზურაბ ჟვანიას ყოფილ თანაგნდელებთან ურთიერთობა არ ჰქონია.

მისი თქმით, მიუხედევად იმისა, რომ გიორგი ბარამიძე მის გვედით ცხოვრობდა, ბოლო ათი წლის განმავლობაში მასთან არ მისულა.

„გიორგი ბარამიძე ჩემს გვერდით ცხოვრობდა. პირველი კვირის გარდა, სანამ რაიმე გაირკვეოდა, მას ჩემს სახლში ფეხი არ შემოუდგამს. მათ მოსასვლელი პირი არ ჰქონდათ. ხათუნა გოგორიშვილი, მიხეილ მაჭავარიანი, გიორგი ბარამიძე და გოკა გაბაშვილი არიან კარგი შემსრულებლები, ზურა რასაც ეტყოდა იმას აკეთებდნენ. თუმცა ზურას გარდაცვალების შემდეგ რასაც სააკაშვილი ეტყვის, იმას აკეთებენ. მათ არანაირი ღირებულება არ აქვთ. ეგენი არ ხედავდნენ ზურა რა პიროვნება იყო? ზურაბ ჟვანიას რჩევას არა მხოლოდ მისი მეგობრები, არამედ მტრებიც ეკითხებოდნენ. ხშირად გამიგია, რომ ზურას სააკაშვილი ურეკავდა და ეკითხებოდა რა გაეკეთებინა“, - განაცხადა ნინო ქადაგიძე-ჟვანიამ.

მისი თქმით, ბოლო ათი წელის მისთვის განსაკუთრებით რთული იყო.

„გირგვლიანის დედამ ვერ გაუძლო და გარდაიცვალა, მე კი სიკვდილის უფლება არ მქონდა, ვინაიდან შვილები მყავდა“ - ამბობს ქადაგიძე.

საქალაქო სასამართლოში ნაფიცი მსაჯულები ზურაბ ჟვანიას საქმეს ამ დრომდე განიხილავენ. დღევანდელ პროცესზე ბრალდებულების კობა ხარშილაძის და მიხეილ ძაძამიას დაკითხვაც იგეგმება. ესპრემიერის გარდაცვალების საქმეზე განაჩენი ერთ თვეში გამოცხადდება.