"გეტყვით რატომ ტყუიან ძაძამია და ხარშილაძე" - ნინო ქადაგიძის ჩვენება სასამართლო დარბაზიდან

სამართალი - 13:46, 14 Jul, 2015

11068

საქალაქო სასამართლოში, სადაც ნაფიცი მსაჯულები ზურაბ ჟვანიას საქმეს განიხილავენ, ნინო ქადაგიძე-ჟვანია იკითხება.

მან დეტალურად გაიხსენა 2005 წლის 2 თებერვლის ღამე, როდესაც გაიგო, რომ მისი მეუღლე გარდაცვლილი იყო.

„ღამის 03:00 საათზე გამეღვიძა და ვნახე, რომ ზურა არ იყო სახლში. დავუწყე ძებნა, ჯერ მასთან დავრეკე, მერე დაცვასთან. ჯერ არც ერთი პასუხობდა. შემდეგ დაცვამ მიპასუხა და მითხრა 5 წუთში დაგალაპარაკებთო. მე გეტყვით ჩემს მოსაზრებას რის გამოც მგონია, რომ კობა ხარშილაძე და მიხეილ ძაძამია ტყუიან", - განაცხადა ქადაგიძემ.

მისი თქმით, კობა ხარშილაძე ტყუის, როცა ამბობს, რომ შემთხვევის ღამეს ბინაში ფანჯრიდან შევიდა.

„ექსპერიმენტით დადგინდა, რომ ხარშილაძე ფანჯარაში ვერ გადაძვრებოდა. არც ფანჯრების ჩამტვრევა გახდებოდა საჭირო, რადგან არც ერთი ფანჯარა არ იკეტებოდა. იყო ფანჯარა, რომელიც ვაკუუმსაც კი ვერ ქმნიდა” - განაცხადა ნინო ქადაგიძემ.

ამის შემდეგ დაცვის მხარის ადვოკატი ბექა ბასილაია დაინტერესდა ესწრებოდა თუ არა ამ ექსპერიმენტს, რაზეც ქადაგიძემ თქვა, რომ არ ესწრებოდა.

ამის შემდეგ ადვოკატი დაინტერესდა, რატომ იყო ოქმზე ქადაგიძის ხელმოწერა, თუ ის ექსპერიმენტს არ ესწრებოდა.

“არ ვიცი, რა ოქმზეა საუბარი, შესაძლოა, ექსპერიმენტის გარკვეულ ნაწილს დავესწარი, თუმცა კონკრეტულად არ მახსოვს, ხარშილაძე როგორ გადაძვრა ფანჯარაში. მე ვამბობ იმას, რომ ხარშილაძე ფიზიკურად ვერ გადაძვრებოდა იქ, სადაც ამბობს, რომ გადაძვრა“, - განაცხადა ქადაგიძემ.