კორტების სპეცოპერაციის საქმეზე დაკავებული ირაკლი ფირცხალავა ამბობს, რომ პროკურატურა ყოფილ სპეცრაზმელებს გაურიგდა.

როგორც დღევანდელ პროცესზე ფირცხალავამ განაცხადა, ე.წ. მატროსოვის ციხეში, სადაც 7 რიგითი სპეცრაზმელი ერთ საკანშია მოთავსებული, შაბათ-კვირა პროკურატურის წარმომადგენელი იმყოფებოდა.

„დავინახე თუ როგორ შედიოდა პროკურორი და ორ-ორად გამოჰყავდა ბრალდებულები. ბრალდებულები საკანში ჩვენების ფურცლებით ბრუნდებოდნენ ჩვენების ფურცლებით, რომლის მიცემაც პროკურატურამ სასამართლოში დაავალა. მათ კონკრეტულ პირობებსაც სთავაზობდნენ - განრიდება ან საპროცესო. რიგითი სპეცრაზმელები არიან უდანაშაულოები, ისინი ჯერ დააკავეს, შემდეგ კი ცდილობენ მათ მორალურად გატეხვას", - განაცხადა ფირცხალავამ.

შეგახსენებთ, რამდენიმე კვირის წინ ე.წ. კორტების სპეცოპერაციის საქმეზე ბრალდებული სპეცრაზმელები ერთ საკანში არიან გადაყვანილი. რაც შეეხება მოტივს, თუ რატომ მოხდა მათი ერთ საკანში მოთავსება, ჯერჯერობით უცნობია.

საქმეზე ბრალდებული კახა ნაკანის ადვოკატი კახა შონია ეჭვობდა, რომ 7 სპეცრაზმელის ერთ საკანში მოთავსება მისი დაცვის ქვეშ მყოფის წინააღმდეგ არის მიმართული. როგორც შონია ამბობდა, ყოფილი სპეცრაზმელები ციხეში პრივილეგირებულ მდგომარეობაში იმყოფებიან, ხოლო ნაკანი დაკავებიდან დღემდე სამარტოო საკანშია მოთავსებული.