"დავიძინე საქართველოში და დილით სამხრეთ ოსეთში გავიღვიძე"

"დავიძინე საქართველოში და დილით სამხრეთ ოსეთში გავიღვიძე" - "გარდიანი" რუსულ ოკუპაციაზე

მსოფლიო - 17:27, 13 Jul, 2015

2944

ბრიტანული გამოცემა "გარდიანი" რუსულ ოკუფაციაზე და სოფელ ხურვალეთის მკვიდრ, დათო ვანიშვილის ისტორიაზე წერს. გთავაზობთ სტატიის ქართულ ვერსიას.

„დათო ვანიშვილი შოკში ჩავარდა, როცა ერთ მშვენიერ დილას სახლიდან გამოვიდა. ეზოში მავთულხლართებით ხელში რუსი მესაზღვრეები დაინახა . მათ ვანიშვილის სახლი ხურვალეთის დანარჩენი ნაწილიდან გამოაცალკევეს, შეიძლება ითქვას, საკუთარი ქვეყნიდანაც

„ როცა დავიძინე, საქართველოში ვიყავი, დილით კი – უკვე სამხრეთ ოსეთში გავიღვიძე“– ამბობს 81 წლის ფერმერი, რომელიც მავთულხლართის გადაღმა იმყოფება.

ოფიციალურად, ეს მთიანი მხარე საქართველოს ნაწილია, მაგრამ რუსული ოკუპაციის შემდეგ, 2008 წლიდან საქართველოს კონტროლს აღარ ექვემდებარება.

ვანიშვილი რუსეთის გეგმის მსხვერპლია, რომელიც რეგიონის ნელ-ნელა შთანთქმას ითვალისწინებს. რუსმა მესაზღვრეებმა გამყოფი ბარიერის – მავთულხლართების გაბმა ორი წლის წინ დაიწყეს და დავით ვანიშვილი საკუთარი ოჯახის იმ წევრებსაც მოწყვიტეს, რომლებიც საქართველოს სხვა ქალქებში ცხოვრობენ

„ახლა მე ჩემს გოგონებსაც კი ვეღარ ვნახულობ“– ამბობს იგი.

ქართველი პროდასავლური პოლიტიკოსები შიშობენ, რომ საქართველო პოზიციებს კარგავს რუსეთის რბილი ძალის წინააღმდეგ, რომელიც პრორუსული პროპაგანდით იმაზე მეტად არის წარმოდგენილი, ვიდრე ეს ადრე იყო. ძლიერ და მაღალი რეიტინგის მქონე ქართულ მართლმადიდებელ ეკლესიასაც მჭიდრო კავშირები აქვს რუსულ ეკლესიასთან. კრიტიკოსები ქართველ მღვდლებს ხშირად „მოსკოვის მეხუთე კოლონას“ უწოდებენ.

ქართველების უმრავლესობას არ მოსწონს ყოფილი იმპერიული მეტროპოლიის პოლიტიკა და თავიანთი ქვეყნის სუვერენიტეტის შენარჩუნების ერთადერთ საშუალებად ნატოსა და ევროკავშირში გაწევრიანება მიაჩნია. საქართველოს ხელისუფლება მთელი ძალისხმევით ცდილობდა ნატოსათვის თავისი ერთგულება დაემტკიცებინა და ასობით ქართველ ჯარისკაცს ჰილმენდის პროვინციაში (ავღანეთი) საბრძოლველად აგზავნიდა, ბრიტანელი და ამერიკელ სამხედრო მოსამსახურეების გვერდით.

მაგრამ რადგანაც საქართველოს მმართველმა კოალიცია „ქართულმა ოცნებამ“ რუსეთის მიმართ ლიბერალური პოზიცია დაიკავა, მოსკოვთან ურთიერთობის ატმოსფერო გარკვეულწილად შეიცვალა. რუსებმა მეორე მსოფლიო ომში გამარჯვების მორიგი წლისთავის აღნიშვნისას, იოსებ სტალინის პორტრეტები გამოიტანეს საქართველოშიც. გორში – მის მშობლიურ ქალაქშიც საკმაოდ უჩვეულო დემონსტრაცია გაიმართა - შეკრებილებმა საქართველოს ევროპული კურსის გამო პროტესტი გამოხატეს და განაცხადეს, რომ ევროკავშირის ფასეულობები ქართულ კულტურასა და ტრადიციებს ეწინააღმდეგება.

შეიცვალა NATO-სთან დამოკიდებულების ენაც. ოფიციალურად, ხელისუფლება ჯერაც აცხადებს, რომ მას ქვეყნის ჩრდილოატლანტიკურ ალიანსში გაწევრიანება სურს, თუმცა ნაკლები ენთუზიაზმით.

საქართველოში აშშ-ის მხარდაჭერის ჟესტად ერთობლივ ქართულ-ამერიკულ სამხედრო მანევრებს განიხილავენ, რომლის მიზანი ალიანსთან ინტეგრაციის განმტკიცებაა და რომელშიც რამდენიმე ასეული ამერიკელი სამხედრო მონაწილეობს.

დავით ვანიშვილის მდგომარეობა საქართველოს სიმბოლურ მდგომარეობას ასახავს. უცხოელ პოლიტიკოსთა დელეგაციები მასთან ხშირად დადიან, უყურებენ მისი სახლის ეზოში არსებულ გამმიჯნავ მავთულხლართს, მაგრამ ამით არაფერი იცვლება. ის გაურკვევლობაშია ჩარჩენილი.

რუსებმა დავით ვანიშვილს გამოსავალი შესთავაზე : რუსეთის მოქალაქეობის მიღება.

„მაგრამ მე არ მინდა რუსული პასპორტი” - ამბობს 81 წლის მოხუცი. „მე საქართველოში დავიბადე და საქართველოში მინდა მოვკვდე.“