ზურაბ ჟვანიას ჟვანიას საქმის პროკურორის რევაზ ნადოის ინფორმაციით, იმ დროს როდესაც ჟვანია სიკვდილს ებრძოდა, მისი დაცვის წევრები რესტორნებში ქეიფობდნენ.

ამის შესახებ ნადოიმ გაზეთ „პრაიმტაიმთან“ ინტერვიუში განაცხადა.

მისი თქმით, იმის მაგივრად, რომ დაცვას წინასწარ შეემოწმებინა ბინა და დაეცვათ გარე პერიმეტრი, მათ ტერიტორია დატოვეს, რითიც დაარღვიეს კანონი.

„ის, რაც ხდებოდა დახურულ კარს მიღმა, არავის საქმე არ არის. აქ საუბარია იმაზე, მიიღეს თუ არა დაცვის წევრებმა ყველა ზომა იქამდე, სანამ ბინაში დაცვის ობიექტს შეუშვებდნენ? შეამოწმეს წინასწარ? რა თქმა უნდა – არა. ამის ნაცვლად მიატოვეს დასაცავი ობიექტი და ერთი მცხეთაში ქეიფობდა, მეორე – რესტორან „მოსკოვში“, შემდეგ კი საბილიარდოში განაგრძო დროსტარება. ხაზგასმით აღვნიშნავ და არსებობს ამის მტკიცებულებები, არსებობენ მოწმეები: როცა ჟვანია პრაქტიკულად სიკვდილს ებრძოდა, მისი დაცვის წევრები რესტორნებში ქეიფობდნენ. არადა საუბარია ძალიან მარტივ ჭეშმარიტებაზე: წინასწარ უნდა ყოფილიყო ბინა ოპერატიულად შესწავლილი, რის შემდეგაც მცველები გარე პერიმეტრს დაიცავდნენ და მუდმივი კონტაქტი ექნებოდათ დასაცავ ობიექტთან. ამ დროს, რას შვრებიან ისინი? ტოვებენ ტერიტორიას და ერთი მიდის მცხეთაში, მეორე – თბილისის ერთ-ერთ რესტორანში. ამის შემდეგ მათ ქმედებას რაიმე გამართლება შეიძლება მოვუძებნოთ? აქ არ არის საუბარი მორალსა და ერთგულებაზე. ჩვენ ყველანი ადამიანები ვართ და ერთგულებაც არავის გვეშლება, მორალი და ზნეობა პროკურორებსაც საკმაოდ გვაქვს, მაგრამ კანონი არის კანონი და ის უნდა დაიცვას ნებისმიერმა ადამიანმა. თუ საუბარია იმაზე, რომ დასაცავი ობიექტის თხოვნის გამო, მათ საკუთარ თავზე აიღეს პასუხისმგებლობა, გამოდის, რომ ისინი პოტენციურად პასუხისმგებლობას იღებდნენ იმაზეც, რაც იქ შეიძლებოდა მომხდარიყო. ვიცით, რაც მოხდა, ადამიანები გარდაიცვალნენ, ახლა ზუსტად ის დროა, რომ თქვან: დიახ, ჩვენ ვიღებთ პასუხისმგებლობას, რადგან გადავუხვიეთ წესს. სწორედ ეს არის ერთგულება და ზნეობა, და არა ის, რომ ყველანაირად ცდილობენ პასუხისმგებლობის თავიდან აცილებას“ - ამბობს ნადოი.

წყარო: გაზეთი "პრაიმტაიმი"