დარჩება თუ არა საბერძნეთი ევროზონაში - გადაწყვეტილება დღეს გახდება ცნობილი

მსოფლიო - 18:52, 12 Jul, 2015

1697

ბრიუსელში ევროზონის რიგგარეშე სამიტზე წევრი 19 ქვეყნის ლიდერი საბერძნეთის კრიზისზე მსჯელობს.

ალექსის ციპრასის გუნდი მზად არის რთული რეფორმები გაატაროს, სანაცვლოდ კი საერთაშორისო კრედიტორებისგან ახალი 53 მილიარდი ევროს ოდენობის კრედიტს ითხოვს.

"ჩვენ გვაქვს შესაძლებლობა დღესვე მივაღწიოთ შეთანხმებას თუ ამას ყველა მხარე მოინდომებს. მზად ვარ გულწრფელი კომპრომისისთვის, რადგან ჩვენ გაგვაჩნია ვალდებულები ევროპელი ხალხის წინაშე, რომელსაც სურს ერთიანი და განუყოფელი ევროპა,"- აცხადებს საბერძნეთის პრემიერ-მინისტრი ალექსის ციპრასი.

სამიტის დაწყებამდე კომენტარი გააკეთა გერმანიის კანცლერმა ანგელა მერკელმა. მისი თქმით, ევროზონის სამიტს ევროჯგუფისგან დოკუმენტები არ მიუღია, რომლის საფუძველზეც შესაძლებელი იქნებოდა საუბარი საბერძნეთის პროგრამაზე მოლაპარაკებების დაწყება.

"ეს გასაკვირი არ არის, რადგან ექსტრემალურად მძიმე ვითარებაა. წინ გველის ურთულესი მოლაპარაკებები. შეთანხმება ნებისმიერი პირობებით არ მოხდება. ევროზონის ფარგლებში თანამშრომლობის პრინციპები არანაკლებ მნიშვნელოვანია, ვიდრე საბერძნეთის მომავალი", - განაცხადა მერკელმა.

ესპანეთის პრემიერ-მინისტრმა მარიანო რახოიმ კი განაცხადა, რომ საბერძნეთის მთავრობამ უნდა შეძლოს ევროპელ პარტნიორებთან ნდობის აღდგენა. წინააღმდეგ შემთხვევაში, ვითარება ძალიან რთულად არის.

ევროკომისიის ხელმძღვანელი ჟან-კლოდ იუნკერი პირობას დებს, რომ იბრძოლებს უკანასკნელ წამამდე იმისთვის, რომ საბერძნეთთან დაკავშირებით შეთანხმება მოხდეს.

ევროპარლამენტის პრეზიდენტის მარტინ შულცი კი, იმედოვნებს, რომ საბერძნეთთან დაკავშირებით კომპრომისი იქნება. "საჭიროა ყველა მხარემ შეძლოს გამონახოს კონსტრუქციული გადაწყვეტილება" , - განაცხადა შულცმა.