დღეს, სრებრენიცის ტრაგედიის 20 წლისთავია. სრებრენიცის ხოცვა-ჟლეტა ერთ-ერთი ყველაზე სისხლიანი დაპირისპირებაა იუგოსლავიაში მიმდინარე სამოქალაქო ომების პერიოდში (ხორვატიისა და ბოსნიის ომები).

სრებრენიცის ანკლავი, რომელიც გაერომ 1993 წლის აპრილში გამოაცხადა „უსაფრთხოების ზონად“, 1995 წლის 11 ივლისს ბოსნიელმა სერბებმა აიღეს. საერთაშორისოდ აღიარებული ვერსიის თანახმად ბოსნიელმა სერბებმა გენერალ რატკო მლადიჩის ხელმძღვანელობით, 8 000 ბოსნიელი-მუსლიმი მამაკაცი მოკლეს, რომელთა ასაკი 13-დან 77 წლამდე მერყეობდა.

2007 წელს საერთაშორისო სასამართლომ ამ ფაქტს გენოციდის კვალიფიკაცია მიანიჭა, ხოლო 2009 წლის იანვარში ევროპის პარლამენტმა 11 ივლისი „სრებრენიცის გენოციდის ხსოვნის დღედ“ გამოაცხადა.

სამი დღის წინ კი, რუსეთმა ვეტო დაადო გაეროს უშიშროების საბჭოს რეზოლუციას, რომელშიც ოცი წლის წინ, სრებრენიცაში განვითრებული მოვლენები გენოციდად არის მოხსნიებული.

სამგლოვიარო ღონისძიებებში მონაწილეობას ხელისუფლების წარმომადგენლებთან ერთად, მოსახლეობაც იღებს. მასიური-ხოცვა ჟლეტის დროს მოკლული 136 მსხვერპლის გვამს კი დღეს პოტოჩარის ძმათა სასაფლაოზე დაკრძალავენ.