"ეს განცხადება შეიძლება საპნის ბუშტივით გასკდეს" - ადვოკატი სპეცრაზმელების მამხილებელ ჩვენებაზე

სამართალი - 13:34, 09 Jul, 2015

1825

ე.წ. კორტების სპეცოპერაციის საქმეზე დაკავებული ირაკლი ფირცხალავას ადვოკატი დავით ხაჟალია ამბობს, რომ პროკურორის მიერ გაკეთებული განცხადება, რომ სპეცრაზმელებმა ხელმძღვანელი პირების საწინააღმდეგო ჩვენება მისცეს, საზოგადოების შეცდომაში შეყვანას ემსახურება.

ამის შესახებ ხაჟალიამ "ნიუპოსტთან" საუბრისას განაცხადა.

„როდესაც ამბობ რა ჩვენებასთან გვაქვს საქმე, როდესაც კონკრეტიზაციას ვერ აკეთებ და ამ შემთხვევაში ამბობ, რომ მამხილებელი ჩვენებები მისცეს ბრალდებულებმა ეს არის საზოგადოების შეცდომაში შეყვანის მცდელობა. მათ შეიძლება თანამდებობის პირები მტკიცებულებათა ფალსიფიკაციაში ამხილეს ან ამხილეს განზრახ მკვლელობაში. ორივე მამხილებელი ჩვენებაა. ამიტომ როდესაც ამბობ, რომ მათ მამხილებელი ჩვენება მისცეს, უნდა დააკონკრეტო. რიგითმა სპეცრაზმელებმა ჩვენება დახურულ კარს მიღმა მისცეს და საზოგადოებისთვის მათი ჩვენების დეტალები უცნობია. ბევრი პროკურორის განცხადება მსმენია მამხილებელ ჩვენებებზე, რომელიც შემდგომ საპნის ბუშტივით შეიძლება გასკდეს სასამართლო სხდომაზე. ეს განცხადებები ჩემთვის არაფერს ნიშნავს. ამ ეტაპზე ვინმეს უდანაშაულობაზე ან დამნაშავეობაზე საუბარი ნაადრევია, რადგან სასამართლო განხილვები მიმდინარეობს“, - განაცხადა ხაჟალიამ.

საქმის პროკურორმა გუშინ განაცხადა, რომ ე.წ. კორტების სპეცოპერაციის საქმეზე რიგითმა სპეცრაზმელებმა ჩვენება ხელმძღვანელების წინააღმდეგ მისცეს. თუმცა პროკურორს არ დაუკონკრეტებია ვის წინააღმდეგ მისცეს კონკრეტულად სპეცრაზმელებმა ჩვენება და რა განაცხადეს მათ.