რა ქონება აღმოაჩნდა მოსამართლეს, რომლის განაჩენმაც ოდესის გუბერნატორი აღაშფოთა

მსოფლიო - 14:11, 08 Jul, 2015

6813

"მოსამართლე, რომელზეც სააკაშვილი გაბრაზდა ფლობს მანქანას, რომელიც მისი ორი წლის შემოსავალი ღირს" - სტატიას სათაურით უკრაინული გამოცემა - 368.media აქვეყნებს. გამოცემის თანახმად, ოდესის ზღვისპირეთის რაიონული საამართლოს მოსამართლე, ალექსეი კაპლია, რომლის გადაწყვეტილებამ, ქრთამის აღების ფაქტზე ორი პოლიციელის გათავისუფლების შესახებ მიხეილ სააკაშვილის აღშფოთება გამოიწვია, შესაძლოა სკანდალში გაეხვეს. უკრაინული მედიის მიერ გავრცელებული ინფორმაციით, მოსამართლე 2012 წლის Mercedes ML 3х-ს ფლობს, რომლის ღირებულებაც 100 ათას დოლარს შეადგენს, რაც მისი ორი წლის შემოსავალს უდრის.

აღნიშნული სტატია "ფეისბუკის" გვერდზე ოდესის ოლქის გუბერნატორმა, მიხეილ სააკაშვილმაც გააზიარა.

"აი, პირველი პუბლიკაციაც. აღმოჩნდა, რომ მოსამართლე კაპლი 2012 წლის Mercedes ML 3х-ით დადის. ეს „მერსედესი“ ზღვაში წვეთია სასამართლო სისტემის უკანონო შემოსავლებიდან" - წერს სააკაშვილი.

ცოტა ხნით ადრე, მიხეილ სააკაშვილმა ოდესის მოსახლეობას კორუმპირებული ჩინოვნიკების მხილებისკენ მოუწოდა.

მიხეილ სააკაშვილის თქმით, თავისუფლებაზე გამოშვებული მექრთამე პოლიციელები ალბათ მოსამართლესთან ერთად სადმე ნიცის ტავერნაში დასხდებიან და უკრაინის ხელისუფლებას დასცინებენ.

„რადგან მოსამართლეები დაგვცინიან, მოდით ჩვენ თვითონ, საზოგადოებამ დავიწყოთ მათი კონტროლი. მე მოვუწოდებ ოდესის მოსახლეობას, შევქმნათ ჯგუფები, რომლებიც გაარკვევენ , სად ცხოვრობს მოსამართლე კაპლანი, როგორ სახლში, როგორი მანქანით დადის...ცხოვრობს კი, ის თავის მოსამართლის ხელფასზე, თუ სხვა შემოსავალი აქვს...რევოლუცია უკრაინაში არ დასრულდება მანამ, ვიდრე ასეთი სუბიექტები უკრაინელ ხალხის დაცინვას აგრძელებენ“ - განაცხადა სააკაშვილმა