საბერძნეთის პრემიერი კრედიტორებს ახალი წიანდადებებით მიმართავს

მსოფლიო - 11:08, 07 Jul, 2015

2379

საბერძნეთის პრემიერ-მინისტრი, ალექსის ციპრასი დღეს, ევროზონის საგანგებო სამიტზე ევროპელ ლიდერებს ახალი წინადადებით მიმართავს. ჯერჯერობით უცნობია, რას შესთავაზებს ციპრასი კრედიტორებს, თუმცა უცხოურ მედიაში გავრცელებული ინფორმაციით, საბერძნეთის პრემიერმა შესაძლოა ვალის 30%-ის ჩამოჭრაც მოითხოვოს. „ბლუმბერგის“ ინფორამციით, ამის შესახებ ციპრასმა ჯერ კიდევ რეფერენდუმამდე განაცხადა.

საბერძნეთის კრიზისთან დაკავშირებით გერმანიისა და საფრანგეთის ლიდერებმა საგანგებო შეხვედრა გამართეს. ფრანსუა ოლანდის განცხადებით, ალექსის ციპრასის მთავრობამ სერიოზული და ისეთი ყურადსაღები წინადადებები უნდა წარადგინოს, რომელთა გრძელვადიან პროგრამად გარდაქმნა და შესაბამისად, საბერძნეთში ვითარების დასტაბილურება იქნება შესაძლებელი.

ანგელა მერკელის განცხადებით, საბერძნეთისთვის მოლაპარაკების კარები ჯერაც ღიაა, თუმცა დრო ძალიან ცოტა რჩება.

შეეგახსენებთ, საბერძნეთში რეფერენდუმი 5 ივლისს ჩატარდა. რეფერენდუმის მონაწილეთა 61.3%-მა საერთაშორისო კრედიტორების მიერ შემოთავაზებული მოთხოვნების შესრულებაზე უარი განაცხადა. პრემიერმა, ალექსის ცირპრასმა მოსახლეობას გაბედული არჩევანისთვის მადლობა გადაუხადა და კრედიტორებთან მოლაპარაკებისთვის მზაობა განაცხადა. მისივე თქმით, ევროზონას ახალ წინადადებებს სწორედ დღეს შესთავაზებს. იმ შემთხვევაში თუ ათენმა კრედიტორებთან შეთანხმებას ვერ მიაღწია, დეფოლტი და ევროზონის დატოვების საფრთხე ემუქრება. საბერძნეთში დაკეტილია ბანკები, მოსახლეობას დღის განმავლობაში ბანკომატიდან მხოლოდ 60 ევროს გამოტანა შეუძლია. ციპრასის განცხადებით, ბანკები ფუნქციონირებას ხუთშაბათს აღადგენს.