საბერძნეთის პრემიერსა და ვლადიმერ პუტინს შორის სატელეფონო საუბარი შედგა

მსოფლიო - 17:00, 06 Jul, 2015

2955

საბერძნეთის პრემიერ-მინისტრს, ალექსის ციპრასსა და რუსეთის პრეზიდენტ, ვლადიმერ პუტინს შორის სატელეფონო საუბარი შედგა, რომლის დროსაც კვირას გამართული საბერძნეთის რეფერენდუმის შედეგები და რუსულ-ბერძნული ურთიერთობების შემდგომი განვითარების საკითხები განიხილეს.

კრემლის პრეს-სამსახურის ინფორმაციით, სატელეფონო საუბრის ინიციატივა ბერძნულ მხარეს ეკუთვნის.

„ვლადიმერ პუტინმა გამოხატა მხარდაჭერა ბერძენი ხალხის მიმართ იმ სირთულეების გადალახვაში, რის წინაშეც ისინი დღეს დგანან" – განაცხადეს კრემლში.

რუსეთის მხრიდან საბერძნეთის ფინანსური დახმარების შესახებ ინფორმაცია დიდი ხანია ვრცელდება, რასაც ორივე მხარე უარყოფს. დღეს დილით, პუტინის პრესსპიკერმა, დიმიტრი პესკოვმა განაცხადა, რომ თუკი საბერძნეთს ფინანსური დამხარება სჭირდება, რუსეთს თავად უნდა მიმართოს, თუმცა ჯერჯერობით მსგავსი თხოვნა არ ყოფილა.

შეგახსენებთ, საბერძნეთში რეფერენდუმი გუშინ ჩატარდა. საბერძნეთის შინაგან საქმეთა სამინისტროს მიერ გამოქვყნებული ბოლო მონაცემებით, რეფერენდუმის მონაწილეთა 61.3%-მა საერთაშორისო კრედიტორების მიერ შემოთავაზებული მოთხოვნების შესრულებაზე უარი განაცხადა. პრემიერმა, ალექსის ცირპრასმა მოსახლეობას უკვე მიმართა და გაბედული არჩევანისთვის მადლობა გადაუხადა და კრედიტორებთან მოლაპარაკებისთვის მზაობა განაცხადა.