სომხეთის პოლიციამ მოედნის ბარიკადებისგან გათავისუფლება დაიწყო

სომხეთის პოლიციამ მოედნის ბარიკადებისგან გათავისუფლება დაიწყო - დაკავებულია 40-მდე აქტივისტი

მსოფლიო - 13:38, 06 Jul, 2015

1210

ერევნის პოლიციამ ბაგრამიანის პროსპექტის ბარიკადებისგან გათავისუფლება დაიწყო.

„რია ნოვოსტის“ ინფორმაციით, ყველა დემონსტრანტი, რომელმაც პოლიციას წინააღმდეგობა გაუწია, დაკავებულია. დაკავებულთა ზუსტი ციფრი უცნობია. "რია ნოვოსტის" ინფორმაციით, მათი რიცხვი მინიმუმ 40-ს შეადგენს.

შეგახსენებთ, დღეს დილით, პოლიციის მიერ გავრცელებული განცხადების თანახმად, აქციის ორგანიზატორებსა და მონაწილეებს მოედნის ბარიკადებისგნა გასათავისუფლებლად ვადა ადგილობრივი დროით 12:30 საათამდე ჰქონდათ, წინააღმდეგ შემთხვევაში სამართალდამცავები მოქმედებას დაიწყებენ.

ამავდროულად, სომხური მედიის ცნობით, დემონსტრანტები მთავრობას ახალი პირობით მიმართავენ. მათი თქმით, 6 ივლისს, 21:00 საათამდე ხელისუფლებამ ერთი თხოვნა მაინც უნდა დააკმაყოფილოს, წინააღმდეგ შემთხვევაში, აქციის მონაწილეები დაიწყებენ ახალ საპროტესტო გამოსვლებს "ერთი ნაბიჯით წინ".

შეგახსენებთ, თითქმის ორი კვირაა სომხეთში საპროტესტო აქციები მიმდინარეობს. მომიტინგეები, სომხეთის მარეგულირებელი კომისიის მიერ ელექტროენერგიის ტარიფის გაძვირებას აპროტესტებენ. კომისიის გადაწყვეტილების თანახმად, ელექტროენერგია 6,93 სომხური დრამით (0,015 დოლარი) ძვირდება და 48,78 დრამი ხდება.

23 ივნისის დილას სომხეთის დედაქალაქში პოლიციამ დემონსტრანტები ძალის გამოყენებით და წყლის ჭავლით დაშალა.

ერთკვირიანი საპროტესტო გამოსვლების შემდეგ პრეზიდენტმა სარგსიანმა განაცხადა, რომ დენის ტარიფის გაზრდასთან დაკავშირებულ ხარჯებს სახელმწიფო საკუთარ თავზე აიღებდა, თუმცა აქციის მონაწილეები დაშლას მაინც არ აპირებენ.

28 ივნისს, მომიტინგეებმა "თავისუფლების მოედნიდან" ბაგრამიანის პროსპექტისკენ გადაინაცვლეს, პოლიციამ მათ ტერიტორიის დატოვებისკენ არაერთხელ მოუწოდა, წინააღმდეგ შემთხვევაში ძალის გამოყენებით დაემუქრნენ.
ამ მოწოდების შემდეგ, მომიტინგეების მასა ორ ნაწილად გაიყო. ნაწილმა ტერიტორია დატოვა და თავისუფლების მოედანზე დაბრუნდა, ნაწილი კი ბაგრამიანის პროსპექტზე დარჩა.