ერევნის პოლიციამ მომიტინგეებს ბარიკადების დასაშლელად ერთი საათი მისცა

მსოფლიო - 12:48, 06 Jul, 2015

1031

ერევნის პოლიციამ მომიტინგეებს ბაგრამიანის პროსპექტის გასათავისუფლებლად ერთი საათი მისცა. ამის შესახებ გამოცემა „ტასსი“ იტყობინება.

„პოლიცია ბაგრამიანის მოედანზე მოძრაობის აღსადგენად ემზადება, რომელიც დემონსტრანტებს ორი კვირაა გადაკეტილი აქვთ“- ნათქვამია ადგილობრივი პოლიციის მიერ გავრცელებულ განცხდებაში.

განცხადების თანახმად, სამართალდამცავები აქციის ორგანიზატორებსა და მონაწილეებს მოუწოდებს, ადგილობრივი დროით 12:30 საათზე თავად გაიტანონ ბარიკდები მოედნიდან, წინააღმდეგ შემთხვევაში ისინი მოქმედებას დაიწყებენ.

ამავდროულად, სომხური მედიის ცნობით, დემონსტრანტები მთავრობას ახალი პირობით მიმართავენ. მათი თქმით, 6 ივლისს, 21:00 საათამდე ხელისუფლებამ ერთი თხოვნა მაინც უნდა დააკმაყოფილოს, წინააღმდეგ შემთხვევაში, აქციის მონაწილეები დაიწყებენ ახალ საპროტესტო გამოსვლებს "ერთი ნაბიჯით წინ".

შეგახსენებთ, თითქმის ორი კვირაა სომხეთში საპროტესტო აქციები მიმდინარეობს. მომიტინგეები, სომხეთის მარეგულირებელი კომისიის მიერ ელექტროენერგიის ტარიფის გაძვირებას აპროტესტებენ. კომისიის გადაწყვეტილების თანახმად, ელექტროენერგია 6,93 სომხური დრამით (0,015 დოლარი) ძვირდება და 48,78 დრამი ხდება.

23 ივნისის დილას სომხეთის დედაქალაქში პოლიციამ დემონსტრანტები ძალის გამოყენებით და წყლის ჭავლით დაშალა.

ერთკვირიანი საპროტესტო გამოსვლების შემდეგ პრეზიდენტმა სარგსიანმა განაცხადა, რომ დენის ტარიფის გაზრდასთან დაკავშირებულ ხარჯებს სახელმწიფო საკუთარ თავზე აიღებდა, თუმცა აქციის მონაწილეები დაშლას მაინც არ აპირებენ.

28 ივნისს, მომიტინგეებმა "თავისუფლების მოედნიდან" ბაგრამიანის პროსპექტისკენ გადაინაცვლეს, პოლიციამ მათ ტერიტორიის დატოვებისკენ არაერთხელ მოუწოდა, წინააღმდეგ შემთხვევაში ძალის გამოყენებით დაემუქრნენ.
ამ მოწოდების შემდეგ, მომიტინგეების მასა ორ ნაწილად გაიყო. ნაწილმა ტერიტორია დატოვა და თავისუფლების მოედანზე დაბრუნდა, ნაწილი კი ბაგრამიანის პროსპექტზე დარჩა.