კადრებში სპეცოპერაციის შემდეგ საგამოძიებო მოქმედებებია აღწერილი, კერძოდ, ჩანს ახალგაზრდების ცხედრები მანქანაში და მანქანიდან იარაღის ამოღების პროცედურა. გაავრცელა. გადაცემის წამყვანმა ნინო ჯღარკავამ განაცხადა, რომ კადრები "ობიექტივმა" ექსკლუზიურად მოიპოვა და არ გამორიცხა, რომ კადრების გავრცელების შემდეგ, შესაძლოა, მისი ან კადრების მიმწოდებლის სიცოცხლეს საფრთხე დაემუქროს, ამასთან წინასწარ ბოდიში მოიხადა მძიმე კადრების ეთერში ჩვენების გამო.

"ობიექტივის" განცხადებით, მასალა 41 წუთს გრძელდება, თუმცა, მათი სიმძიმის გამო, ეთერში მხოლოდ 12 წუთი გავიდა. ჟურნალისტ ნინო ჯღარკავას თქმით, კადრები ექსკლუზიურია და ის არ გამოჩენილა არც სასამართლოში. მისივე თქმით, სრული მასალა პროკურატურას გადაეცემა.

ზემოთხსენებული კადრები ეთერში ერთსაათიანი ინტერვალით, ორჯერ გავიდა. გადაცემის წამყვანი და მოქალაქეები, რომლებიც სტუდიაში რეკავდნენ, აცხადებდნენ, რომ ეს კადრები გამოდგება დასადასტურებლად, როგორ უდანაშაულოდ დახოცეს სამი ახალგაზრდა სპეცრაზმელებმა, რომლებსაც ირაკლი ფირცხალავა მეთაურობდა.

ზურაბ ვაზაგაშვილის ოჯახის ადვოკატის მტკიცებით, კადრები მნიშვნელოვანი მტკიცებულებაა იმისა, რომ ყველა გასროლა "გარედან შიგნით" მიმართულებით მოხდა, რაც გამორიცხავს ოფიციალურ ვერსიას, თითქოს ახალგაზრდები შეიარაღებულნი იყვნენ და საყაჩაღოდ მიდიოდნენ. კადრების გავრცელებას დიდი რეზონანსი მოჰყვა სოციალურ ქსელებშიც.

შეგახსენებთ, რომ სპეცოპერაცია კორტებთან 2006 წლის 2 მაისს ჩატარდა. სპეცოპერაციის დროს ზურაბ ვაზაგაშვილი და თემურ ხუბულოვი დაიღუპნენ, ფუთურიძე კი დაიჭრა.

მედიაკავშირ "ობიექტივის" მიერ გავრცელებული ვიდეომასლა შეგიძლიათ ნახოთ აქ