საბერძნეთი კრედიტორებთან შეთანხმებას რეფერენდუმის შემდეგ გააფორმებს

საბერძნეთი კრედიტორებთან შეთანხმებას რეფერენდუმის შემდეგ გააფორმებს - ალექსის ციპრასი

მსოფლიო - 20:28, 01 Jul, 2015

1985

საბერძნეთის პრემიერ-მინისტრის, ალექსის ციპრასის განცხადებით, საბერძნეთი კრედიტორებთან შეთანხმებას რეფერენდუმის შემდეგ გააფორმებს. "სიენენის" ინფორმაციით, ამის შესახებ ციპრასმა მოსახლეობისადმი მიმართვისას განაცხადა.
"ვითარება ძალიან დაძაბულია.ჩვენ მოგვიწოდებენ, რომ მხარი დავუჭიროთ იმ შემოთავაზებებს , რასაც კრედიტორები გვთავაზობენ. მაგრამ გაიხსენეთ ის მძიმე დღეები, რომელიც გამოვიარეთ, გაიხსენეთ, ვინ მიიღო ის მემორანდუმები, რომლებსაც არავითარი ეფექტი არ მოუტანია" - განაცხადა ციპრასმა.
მისი თქმით, რეფერენდუმზე პასუხი "არა" - არ ნიშნავს ევროპასთან კავშირის გაწყვეტას, არამედ ეს ნიშნავს ევროპაში ნამდვილი ღირებულებების დაბრუნებას.
"მინდა დაგარწმუნოთ, რომ ეს ვითარება დროებითია. ხელფასები და პენსიები არ დაიკარგება" - განაცხადა საბერძნეთის პრემიერმა. საგარეო ვალის შესახებ რეფერენდუმი 5 ივლისს ჩატარდება. მოსახლეობამ პასუხი უნდა გასცეს შეკითხვას – უნდა გადაიხადოს თუ არა ქვეყანამ წლების განმავლობაში დაგროვილი მრავალმილიარდიანი კრედიტი, რომელიც ათენს დეფოლტის თავიდან ასაცილებლად ევროკავშირმა და საერთაშორისო სავალუტო ფონდმა გამოუყვეს
შეგახსენებთ, საბერძნეთი ევროკავშირის პირველი წევრი ქვეყანა გახდა, რომელმაც საერთაშორისო დავალიანება დათქმულ დროში ვერ გადაიხადა. მილიარდ 600 მილიონის ოდენობის ვალის დაბრუნების ვადა, ათენს გუშინ ღამის 12 საათზე ამოეწურა. ვადა გაუვიდა ფინანსური დახმარების პროგრამასაც.რამდენიმე საათის წინ გავრცელებული ინფორმაციით, საბერძნეთი დათმობაზე წავიდა. საბერძნეთის მთავრობა მზადაა კრედიტორთა თითქმის ყველა პირობას დათანხმდეს. ალექსის ციპრასმა მხოლოდ ორი ცვლილების შეტანა მოითხოვა - დამატებული ღირებულების გადასახადის დაწევა და საპენსიო ასაკის 67 წლამდე გაზრდა, რომელიც ძალაში ოქტომბრიდან უნდა შევიდეს.იმ შემთხვევაში თუკი საბერძნეთმა კრედიტორებთან შეთანხმებას ვერ მიაღწია, ქვეყანას დეფოლტი და ევროზონის დატოვება ემუქრება.