გადადგომის შემთხვევაში კვიტაშვილი არ აპირებს უკრაინაში დარჩენას

გადადგომის შემთხვევაში კვიტაშვილი არ აპირებს უკრაინაში დარჩენას - მინისტრის პასუხი

მსოფლიო - 19:35, 01 Jul, 2015

1299

უკრაინის ჯანდაცვის მინისტრს ალექსანდრე კვიტაშვილს მიაჩნია, რომ მის გადადგომას მედიკამენტების შესყიდვის პროცედურის შეცვლის გამო ლობირებენ.

ამის შესახებ მან ჯანდაცვის სამინისტროში გამართულ პრესკონფერენციაზე განაცხადა.

,,მე ჩამოვედი უკრაინაში, რომ განვახორციელო რეფორმები. ჩვენ ყველაფერი მზად გვაქვს. ჩვენ აბსოლუტურად შევცვალეთ მედიკამენტების შესყიდვის პროცედურა. ჩვენ ავირჩიეთ გამჭვირვალე, ნორმალური, ცივილიზებული, ევროპული გზა. მე მესმის, რომ არსებბობენ ადამიანები, რომლებსაც ძალიან აღელვებთ ის 4 მილიარდი გრივნა, რომელსაც ადრე ერთმანეთში ინაწილებდნენ შესყიდვების დროს. მე მესმის, რომ ბევრი ,,ამხანაგი“ რომლებიც ჯანდაცვის სისტემის სხვადასხვა ადგილას არიან მოკალათებული თავიანთ შემოსავლებს კარგავენ. მე მესმის, რომ რეფორმები, რომლებიც დაიწყება თუ უმაღლესი რადა მიიღებს პანონპროექტს რეფორმებთან დაკავშირებით, ძალიან ბევრი დაკარგავს თავის ადგილს“ - აღნიშნა კვიტაშვილმა.

მან ხაზი გაუსვა, რომ ეს შეიძლება პირველი და უკანასკნელი შანსი იყოს უკრაინისთვის რაღაცის შეცვლის.

,,ჩვენ უნდა გავუძლოთ. სისტემა 6 თვე გვეწინააღმდეგებოდა. ბევრი არ არის დაინტერესებული ცვლილებებით და სხვადასხვა ჯგუფების გავლენის ქვეშ იმყოფებიან. მათ შორის უმაღლეს რადაში და მთავრობაშიც“ - განაცხადა მინისტრმა.

მისი სიტყვებით, შიდაგამოძიება, რომლის ინიცირებც პრემიერმინისტრმა მოახდინა, უნდა დავთავრებულიყო 10 ივნისს.

,,რაზე მიდის საუბარი?! მე არ ვიცნობ ადამიანს, რომელიც დღეს გამოდიოდა. მე მას არ ვიცნობ, მე არ მესმის ტაქტიკა. საკუთარი კოალიცია ასეთი მეთოდებით მუშაობს. ზოგიერთს რეფორმები არ სურთ. უნდათ, რომ ქვეყანა იყოს ისე, როგორც უკანასკნელი 25 წლის განმავლობაში, რომ ისხდნენ და ჩუმად ჭრიდნენ ფულს, რომ არაფერი არ შეიცვალოს სისტემაში, რომ კრიზისის, ხმაურის ფონზე შეისყიდონ წამლები და ყველაფერი დარჩეს სახელმწიფოს კონტროლის ქვეშ, სადაც ყველა იპარავს. რომ სამედიცინო დაწესებულებები დარჩნენ საბჭოთა სუნიან დაწესებულებებად. მე დავდივარ ქვეყანაში, სიტუაცია კატასტროფული, რა დღეშია საავადმყოფოები? რა დღეში არიან ექიმები, რომლებიც იღებენ 2000 გრივნას და პაციენტს ჯიბეში უყურებენ“ - განაცხადა კვიტაშვილმა.

მინისტრმა ასევე აღნიშნა, რომ არ დარჩება უკრაინაში თუ მას გადააყენებენ.

,,უმჯობესი იქნებოდა, რომ რადას ხმა მიეცა რეფორმატორული კანონპროექტებისთვის და არა ჩემი გადადგომისთვის“ - აღნიშნა კვიტაშვილმა.

როგორც უკრაინული გამოცემა ,,უნიანი“ წერს, საპარლამენტო ფრაქცია ,,პრეტრო პოროშენკოს ბოლკის“ ლიდერმა იური ლიცენკომ პარლამენტში განაცხადა, რომ მის პოლიტიკურ ძალას ბევრი კითხვა აქვს ჯანდაცვის სამინიტროში არსებულ კატასტროფულ სიტუაციასთან დაკავშირებით და პეტრო პოროშენკოს ბლოკი ვერ მოითმენს იმ უმოქმედობას, რომელიც უკრაინელებისთვის ამ მნიშვნელოვან უწყებაში ხდება.