დონაძემ და მისმა იურისტებმა წარმოადგინეს რობაქიძის საქმის მოწმეების ჩვენებები და საქმის რამდენიმე თავი. მათი მტკიცებით საქმეში დევს ვინმე გიორგი კაშიასა და ქეთი კუპრეიშვილის ჩვენებები, რომლებსაც ეკუთვნოდათ ის იარაღი, რომელიც რობაქიძის საქმეში ფიგურირებდა.

კაშია და კუპრეიშვილი ჩვენებებში მიუთითებენ, რომ 2000 წელს მათი სახლი გაიქურდა და მათი კუთვნილი იარაღები დაიკარგა, ერთ-ერთი სწორედ ის ბარაბნიანი პისტოლეტი იყო, რომელიც შემდეგ რობაქიძის საქმეში ფიგურირებდა.

მოგვიანებით, როგორც დონაძე აცხადებს, ეს იარაღი ვინმე ნუგზარ გვაზავაზე გაჩუქდა, 2012 წელს კი, როცა საქმე განახლდა გამომძიებელმა ნიქაბაძემ, რომელიც რობაქიძის საქმეს იძიებდა. დაიბარა კაშია და კუპრეიშვილი და მოსთხოვა რომ, იარაღი ოფიციალურად გადაეფორმებინათ ვინმე გვაზავაზე. დონაძის განცხადებით, ნუგზარ გვაზავა ნიქაბაძის ახლო მეგობარია და ნივთმტკიცება თავად გამომზიებელმა გააჩუქა.

,,2000 წელს კაშიების ბინა გაიქურდა, იქ იყო რამდენიმე რეგისტრირებული იარაღი. ერთ -ერთი პისტოლეტი ჩნდება რობაქიძის საქმეში. ეს პისტოლეტი, როცა წავიდა ექსპერტიზაზე, როგორც ჩანს, კარგად იმუშავა გამოძიებამ და დაადგინა იარაღის კანონიერი მფლობელი. დაუძახა მათ გამოძიებამ (მაშინ ნიქაბაძე იძიებდა ამ საქმეს) და ჰკითხა, ეს იარაღი თქვენია? მათაც უთხრეს- კი ჩვენია და დაგვიბრუნებთ თუ არაო? გამოძიებამ კაშიების ოჯახს არ უთხრა რა საქმეზე იყო ნანახი ეს იარაღი , უთხრა, რომ ცოტა ხანს ვერ დაგიბრუნებთო, რაღაც საქმეზეა საჭიროო.

რამდენიმე წლის შემდეგ, 4 წლის შემდეგ რობაქიძის საქმიდან დავიწყოთ ათვლა. ნიქაბაძე შეხვდა ყვარელში თუ თელავში ძმაკაცს, უთხრა გაჩუქებ იარაღსო, ადრე რომ დაგპირდიო და საბარგულიდან ამოუღო ეს იარაღი, ნივთმტკიცება და აჩუქა. ისე მოაგვარა, რომ მერე დაურეკა კაშიების ოჯახს და უთხრა, მოდით იარაღი უნდა გადავაფორმოთ ასეა საჭიროო. აგერ წერენ ჩვენებაში როგორ, მოტყუებით თუ სიმართლით, გადაფორმდეს,"- ჰყვება დონაძე.

ჯერ-ჯერობით უცნობია, დაიკითხა თუ არა ნიქაბაძე ამ ფაქტზე და ასევე უცნობია, დაინტერესდება თუ არა პროკურატურა დონაძის მიერ მოყოლილი დეტალებით.