კინოცენტრის დირექტორის შესარჩევად კონკურსი გამოცხადდა

საზოგადოება - 13:39, 26 Feb, 2013

356

კონკურსში მონაწილეობის მსურველებმა სხვადასხვა დოკუმენტებთან ერთად, კინოცენტრის განვითარების სამწლიანი პროგრამა უნდა წარადგინონ.

კონკურსი ორ ეტაპად გაიმართება. პირველ ეტაპზე კანდიდატურები შეირჩევიან მათ მიერ წარმოდგენილი დოკუმენტაციის საფუძველზე. მათგან ის კონკურსანტები, რომლებიც არ იქნებიან მიწვეულები მეორე ტურზე, ავტომატურად ეთიშებიან კონკურსს. მეორე ეტაპზე კი, გასაუბრება ჩატარდება. საბუთები მიიღება საქართველოს კულტურისა და ძეგლთა დაცვის სამინისტროს საქმის წარმოების სამმართველოში 2013 წლის 15 მარტის 18:00 საათამდე.

ეროვნული კინოცენტრის ყოფილ დირექტორს - თამარ ტატიშვილს, თანამდებობაზე ყოფნის ვადა 25 თებერვალს ამოეწურა. კულტურისა და ძეგლთა დაცვის მინისტრის გურამ ოდიშარიას განცხადებით, ტატიშვილის მოღვაწეობა განსაკუთრებით წარმატებული და ნაყოფიერი იყო. მის სახელს უკავშირდება საქართველოს ევროპის საბჭოს კინოს მხარდაჭერის ფონდში „ევრიმაჟი“ გაწევრიანება; საქართველოს მიერთება ისეთ ორგანიზაციასთან, როგორიცაა „ევროპული კინოს პრომოუშენი“; ეროვნულ კინოცენტრში ევროპული კოპროდუქციების დაფინანსების კონკურსის შემოღება; წამყვანი საერთაშორისო ფესტივალებში მონაწილეობა და ა.შ.