სომხურმა სამოქალაქო მოძრაობამ „არა ძარცვას“, რომელიც ელექტროენერგიაზე ტარიფის ზრდას აპროტესტებს, ერევნის თავისუფლების მოედანზე მჯდომარე აქციის შეწყვეტის გადაწყვეტილება მიიღო. ამის შესახებ ჟურანლისტებს მოძრაობის აქტივისტმა, მაქსიმ სარქისიანმა განუცხადა, სამომავლო გეგმების შესახებ კი დღეს დაგეგმილ პრესკონფერენციაზე ისაუბრებს.

რაც შეეხება მომიტინგეთა მეორე ნაწილს, ბაგრამიანის ქუჩაზე შეკრებილი დემონსტრანტები დაშლას არ აპირებენ. მაქსიმ სარქისიანი არ გამორიცხავს, რომ მისი მოძრაობის ზოგიერთი წევრი ბაგრამიანის ქუჩის აქტივისტებს შეუერთდეს.

შეგახსენებთ, სომხეთის მარეგულირებელმა კომისიამ ელექტროენერგიაზე ტარიფი გააძვირა, კომისიის გადაწყვეტილების თანახმად, ელექტროენერგია 6,93 სომხური დრამით (0,015 დოლარი) ძვირდება და 48,78 დრამი ხდება.

აღნიშნული გადაწყვეტილება ერევნის მოსახლეობამ გააპროტესტა. 23 ივნისის დილას სომხეთის დედაქალაქში პოლიციამ დემონსტრანტები ძალის გამოყენებით და წყლის ჭავლით დაშალა.

ერთკვირიანი საპროტესტო გამოსვლების შემდეგ პრეზიდენტმა სარგსიანმა განაცხადა, რომ დენის ტარიფის გაზრდასთან დაკავშირებულ ხარჯებს სახელმწიფო საკუთარ თავზე აიღებდა, თუმცა აქციის მონაწილეები დაშლას მაინც არ აპირებენ.

28 ივნისს, მომიტინგეებმა "თავისუფლების მოედნიდან" ბაგრამიანის პროსპექტისკენ გადაინაცვლეს, პოლიციამ მათ ტერიტორიის დატოვებისკენ არაერთხელ მოუწოდა, წინააღმდეგ შემთხვევაში ძალის გამოყენებით დაემუქრნენ.
ამ მოწოდების შემდეგ, მომიტინგეების მასა ორ ნაწილად გაიყო. ნაწილმა ტერიტორია დატოვა და თავისუფლების მოედანზე დაბრუნდა, ნაწილი კი ბაგრამიანის პროსპექტზე დარჩა.

ხატია ლაღიძე