პოლიცია ერევანში მომიტინგეებს დაშლისთვის დროს აძლევს

მსოფლიო - 18:47, 28 Jun, 2015

1598

ერევანში პოლიცია წესრიგის აღსადგენად ემხადება. პოლიციის უფროსი მომიტინგეებს მოუწოდებს, დაშალონ ბაგრამიანის მოაედანზე ბარიკადები და გზა გახსნან. წინააღმდეგ შემთხვევაში, სამართალდამცავები 23:00 საათიდან კანონის თანახმად დაიწყებს მოქმედებას, ხოლო კანონდამრღვევები დაისჯებიან.

პოლიციის უფროსი აცხადებს, რომ ბოლო 6 დღის განმავლობაში პოლიციას დემონსტრანტები არ დაურბევია და მათ საკუთარი პოზიციის გამოხატვის საშუალებას აძლევდა, თუმცა დღეს, როდესაც პრეზიდენტი გარკვეულ დათმობაზე წავიდა და ელექტროენერგიის ტარიფის ფასნამატის ბიუჯეტიდან დაფინანსებას დაჰპირდა, მიტინგის გაგრძელების აუცილებლობა აღარ არსებობს.

ერევანში საპროტესტო აქციის მონაწილეები დაშლას არ აპირებენ, მიუხედავად იმისა რომ სომხეთის პრეზიდენტი სერჟ სარგსიანი გარკვეულ დათმობებზე წავიდა. აქციის მონაწილეების განცხადებით, ისინი აქციებს გააგრძელებენ.

როგორც ცნობილია, 27 ივნისს, სომხეთის პრეზიდენტმა განაცხადა, რომ ელექტროენერგიის გადასახადზე ფასდანამატს სახელმწიფო დააფინანსებს, იმ დრომდე, ვიდრე ენერგოკომპანიის შესახებ აუდიტორული დასკვნა არ მომზადდება.

მომიტინგეები აცხადებენ, რომ მთავრობას მათი მოტყუება სურს და ეს მხოლოდ დროებითი ზომაა და ისინი ხელისუფლებისაგან გრძელვადიან გადაწყვეტილების მიღებას ელოდებიან.