დაპირისპირება სააკაშვილთან - ,,მაიდნის შემდეგ ისევ ისეთები დარჩით“ (ვიდეო)

მსოფლიო - 20:30, 26 Jun, 2015

10525

ოდესის ოლქის ადმინისტრაციის ხელმძღვანელს, მიხეილ სააკაშვილს უკრაინის ინფრასტრუქტურის სამინისტროში გამართულ პრესკონფერენციაზე სახელმწიფო ავიაციიის სამსახურის თავმჯდომარე დენის ანტონიუკთან სიტყვიერი შელაპარაკება მოუვიდა. პრესკონფერენციაზე განიხილებოდა ოდესის აეროპორტში „ღია ცის“ პრინციპის დანერგვა.

სააკაშილის თქმით „ღია ცის“ პრინციპი ვერაფერს შეცვლის, თუ ბილეთების ფასი იგივე დარჩება და ფრენებზე მონოპოლია მხოლოდ რამდენიმე კომპანიას ექნება. სააკაშვილის თქმით, აუცილებელია რომ ამ სფეროში ბევრი კომპანია შემოვიდეს და კონკურენცია იყოს.

უკრანის სახელმწიფო ავიაციის ხელმძღვანელი მიხეილ სააკაშვილს შეეპასუხა და განაცხადა, რომ მსგავსმა რეფორმებმა საქართველოში შედეგი ვერ გამოიღო.

„ძვირფასო, 6 მილიონი ტურისტი შედეგი არაა? მინდა რომ სწორედ ასეთი „უშედეგობა“ იყოს ოდესაშიც. რატომ იყო 6 მილიონი ტურისტი? იმიტომ რომ ისეთები, როგორიც თქვენ და თქვენი უფროსები ხართ ჩვენ ხელისუფლებას ვერ მიუთითებდნენ, ვინ შემოეშვათ ამ სფეროში და ვინ არა“- განაცხადა სააკაშვილმა.

დისკუსიაში ინფრასტრუქტურის მინისტრიც ჩაერთო და განაცხადა, რომ უკრაინაში ლიბერალიზაცია უკვე მიმდინარეობს, თუმცა მიხეილ სააკაშვილი არც მას დაეთანხმა.

„მე თქვენთან აღარ ვიკამათებ, თქვენთან ყველაფერი ნათელია. აქ იყო მაიდანი, მაგრამ მაიდანის შემდეგ ისევ ისეთები დარჩით, თქვენც და ეს კომისიაც. უკრაინელ ხალხი იმსახურებს, რომ იფრინოს სამჯერ უფრო იაფად, ხარისხიანი თვითმფრინავებით, იცხოვროს ნორმალურ სასტუმროებში. თქვენ ოლიგარქებს კი მოუწევთ შემჭიდროვება და 5 მილიარდის ნაცვლად ექნებათ ოთხი. ამაში არაფერი ცუდი არ იქნება. დანარჩენი მოხმარდება უკრაინელ ხალხს. სულ ეს არის, შეხვედრამდე“- განაცხადა მიხეილ სააკაშვილმა და პრეს-კონფერენცია მის დასრულებამდე დატოვა.