რუსული მედია ბორის ნემცოვის მკვლელობის საქმის ახალ დეტალებზე წერს. გამოძიების მსვლელობაში ახალი მოწმე, ჟურნალისტი და საზოგადო მოღვაწე ალექსანდრე რიკლინი გამოჩნდა, რომლის თქმითაც რამზან კადიროვი 2002 წელს ბორის ნემცოვს დაემუქრა. როგორც ნემცოვის ადვიკატმა, ვადიმ პროხოროვმა „ბიბისის“ განუცხადა, ნემცოვს ჩეჩნეთში რუსეთის ხელისუფლების გაკრიტიკების გამო 2-ჯერ დაემუქრნენ.

პირველი შემთხვევა, გუდერმესის ერთ-ერთ საკონფერენციო დარბაზში მოხდა. ჟურნალისტის თქმით, ნემცოვთან ФСБ-ის მოქმედი თანამშრომელი მივიდა და მისი შესაძლო ლიკვიდაციის შესახებ აცნობა. ამის შესახებ ნემცოვი საკუთარ წიგნშიც წერს. მოგვიანებით ნემცოვს აცნობეს, რომ ეს რამზან კადიროვი იყო. „გარდა ამისა, კადიროვი ნემცოვს ქუჩაში, ყველას თვალწინ დაემუქრა“ - განაცხადა რიკლინმა.

პროხოროვმა ხაზგასმით აღნიშნა , რომ ნემცოვის ლიკვიდირების შესახებ ინფორმაცია საფრთხედ არა მარტო პოლიტიკოსმა, არამედ ჩეჩნეთის იმჟამინდელმა მეთაურმა ახმედ-ხაჯი კადიროვმაც აღიქვა და ნემცოვს დაცვა გამოუყო.

რუსი ოპოზიციონერი ბორის ნემცოვი, 27 თებერვალს კრემლთან ახლოს ხიდზე მოკლეს. პოლიციამ, მკვლელობაში ეჭვმიტანილი 5 ადამიანი დააკავა. ერთერთმა ეჭვმიტანილმა, ზაურ დადაევმა აღიარებითი ჩვენებაც მისცა და განაცხდა, რომ ნემცოვი მუჰამედ წინასწარმეტყველის შესახებ ნეგატიური განცხადებების გაკეთებისა და "შარლი ებდო-ს" კარიკატურების მხარდაჭერის გამო მოკლა. მოგვიანებით, მან ჩვენება შეცვალა, დანაშაული უარყო და განაცხადა, რომ წინასწარ გამზადებულ ჩვენებაზე ხელი მოწერა აიძულეს.

ნემცოვის ოჯახი რამდენიმე თვეა კადიროვის დაკითხვას ითხოვს.