ერევანში პროტესტი გრძელდება - პრეზიდენტმა ქვეყანა რამდენიმე დღით დატოვა

მსოფლიო - 11:11, 25 Jun, 2015

1870

სომხური მედიის ცნობით, ქვეყანაში მიმდინარე საპროტესტო აქციის ფონზე სომხეთის პრეზიდენტი სერჟ სარქისიანი ორდღიანი ვიზიტის ფარგლებში ბრიუსელში გაემგზავრა, თუმცა გამგზავრებამდე მთავრობას სიტუაციიდან გამოსავლის მოძებნა მოსთხოვა.
გუშინ შეხვედრა გაიმართა პრემიერმინისტრ ოვიკ აბრამიანსა და საზოგადოებრივი მომსახურებების მარეგულირებელი კომისიის ხელმძღვანელ რობერტ ნაზარიანს შორის. ნაზარიანის თქმით შეხვედრაზე საპროტესტო აქციის შესახებ საუბარი არ ყოფილა და შეხვედრის თემა წინასწარ დაგეგმილი იყო. რობერტ ნაზარიანმა ასევე განმარტა, რომ კომისიას შეუძლია გააუქმოს თავისი გადაწყვეტილება, მხოლოდ მას შემდეგ თუ ის „სომხეთის ელექტრო ქსელებისგან“ ოფიციალურ წერილს მიიღებს ტარიფის შემცირებასთან დაკავშირებით.

სოხურ მედიაში არ გამორიცხავენ იმასაც, რომ „სომხეთის ელექტრო ქსელების “ ხელმძღვანელობა შეიცვალოს.

შეგახსენებთ, სომხეთის მარეგულირებელმა კომისიამ ელექტროენერგიაზე ტარიფი გააძვირა, კომისიის გადაწყვეტილების თანახმად, ელექტროენერგია 6,93 სომხური დრამით (0,015 დოლარი) ძვირდება და 48,78 დრამი ხდება.

აღნიშნული გადაწყვეტილება ერევნის მოსახლეობამ გააპროტესტა. 23 ივნისის დილას სომხეთის დედაქალაქში პოლიციამ დემონსტრანტები ძალის გამოყენებით და წყლის ჭავლით დაშალა. ათასობით მოქალაქემ ერევანის ცენტრალური გამზირი ელექტროენერგიაზე ტარიფების გაზრდის გამო გადაკეტა, რასაც საბოლოოდ პრეზიდენტის გადადგომის მოთხოვნაც დაემატა. პოლიციამ დემონსტრატები რამდენჯერმე გააფრთხილა და ცენტრალური გამზირის გათავისუფლებისკენ მოუწოდა, რაზეც დემონსტრატების უმრავლესობამ უარი განაცხადა.