უკრაინის ყოფილმა პრეზიდენტმა, ვიქტორ იანუკოვიჩმა „ბიბისისთან“ ინტერვიუში მაიდნის მოვლენებზე, ყირიმის ოკუპაციასა და მის წინააღმდეგ არსებულ ბრალდებებზე ისაუბრა.

იანუკოვიჩმა 2014 წლის თებერვალში ანტისამთავრობო გამოსვლების დროს კიევის დამოუკიდებლობის მოედანზე დემონსტრანტების მკვლელობაზე პასუხისმგებლობა ნაწილობრივ აიღო.

„მე არ უარვყოფ პასუხისმგებლობას“ - განაცხადა იანუკოვიჩმა მაიდნის მოვლენებზე საუბრისას.

იანუკოვიჩმა ხაზგასმით აღნიშნა, რომ მომიტინგეთა წინააღმდეგ იარაღის გამოყენებისა და ცეცხლის გახსნის ბრძანება არასოდეს გაუცია, თუმცა დასძინა, რომ სისხლისღვრის თავიდან ასაცილებლად საჭირო ზომები არ მიუღია.

„თუმცა უსაფრთხოების ძალებმა კანონის ფარგლებში თავიანთი მოვალეობა შეასრულეს. მათ ჰქონდათ იარაღის გამოყენების უფლება“ - განაცხადა ექსპრეზიდენტმა.

ყირიმის ანექსიაზე საუბრისას, იანუკოვიჩმა ომს ღამის კოშმარი უწოდა, რომელიც რეალობად იქცა. "დღეს ამ ვითარებიდან გამოსვლის გზები უნდა ვეძიოთ. ახლა ომია. ისინი ყირიმის დაბრუნებაზე საუბრობენ, მაგრამ როგორ? ომით? გვინდა კიდევ ერთი ომი? - განაცხადა იანუკოვიჩმა.

მისივე თქმით, კიევში მის ოპონენტებს არ უნდა განეხორციელებინათ სამხედრო გადატრიალება და არ უნდა მომხდარიყო მემარცხენე-რადიკალური ძალების ფორმირება.
"მე ისინი გავაფრთხილე, რომ ისინი მაიდანზე არ შეჩერდებოდნენ, რომ ისინი უფრო შორს წავიდოდნენ და ასეც მოხდა. მათ დაანაწევრეს ქვეყანა. მათ მთელი მსოფლიო ამ კონფლიქტში ჩართეს" - აღნიშნა იანუკოვიჩმა.

მისი თქმით, დონბასი უკრაინის ნაწილად უნდა დარჩეს და აშშ-მა და ევროკავშირმა უნდა მოუწოდონ კიევს, ამბოხებულთა ლიდერებთან მოლაპარაკებები გამართონ.

უკრაინის ყოფილმა პრეზიდენტმა მის წინააღმდეგ არსებული ბრალდებები უარყო და განაცხადა, რომ მას უკრაინის ბიუჯეტიდან თანხები არ მოუპარავს. თუმცა, აღიარა, რომ ქვეყანაში იყო კორუფცია.

იანუკოვიჩის თქმით, 2014 წლის 23 თებერვალს, სპეცსამსახურების გაგზავნით, ვლადიმერ პუტინმა მისი სიცოცხლე იხსნა.

„ის, რომ ვლადიმერ პუტინმა ჩემ გადასარჩენად სპეცსამსახურის ძალები გამოგზავნა, მისი მხრიდან სწორი საქციელი იყო. რა თქმა უნდა მისი მადლიერი ვარ, რადგან ჩემი სიცოცხლე იხსნა“ - განაცხადა იანუკოვიჩმა.

ინტერვიუს დასასრულს, იანუკოვიჩმა აღნიშნა, რომ მას იმედი აქვს, რომ ერთ დღესაც უკრაინაში დაბრუნდება.