ე.წ. ჯაშუშების საქმეზე მიმდინარე პროცესი ბაჩო ახალაიამ პროტესტის ნიშნად დატოვა. ახალაიას პროტესტი იმ ფაქტმა გამოიწვია, რომ პროკურატურამ ბრალდების მოწმეთა დასაკითხად რამდენიმე წუთი ითხოვა. მათი ინფორმაციით, მოწმე 13:30 წუთზე იყო დაბარებული, რის გამოც ბრალდებულის მხარემ მოსამართლეს შესვენების გამოცხადების თხოვნით მიმართა.

„რისთვის მოვყავარ, რომ ჯურღმულში დამაბან? იმ საშინელებაში ვერ შევისვენებ. უჩემოდ გაარძელეთ სხდომა. შემდეგ სხდომაზე სთხოვეთ პროკურატურას, ბატონო მოსამართლე, რომ დროულად დაიბარონ მოწმე“, - განაცხადა ახალაიამ.

პროცესზე ბრალდების მხარის მოწმის, პოლკოვნიკ სერგო თეთრაძის მეუღლის ნანა თეთრაძის დაკითხვაც იგეგმება.

აღნიშნულ საქმეზე ახალაიას გამოძიება ჯაშუშებად გამოცხადებული პირების წამების ორგანიზებას ედავება. ამავე საქმეშია გაერთიანებული კიდევ ერთი ეპიზოდი, სადაც ექსმინისტრს თანხების მითვისება-გაფლანგვა ედება ბრალად. ამავე ეპიზოდში ბრალი აქვთ წარდგენილი მეგის ქარდავას და ნიკა ძიმცეიშვილს.