მოკლული ლაშა მახარაძის დედა იმედოვნებს, რომ ნაფიც მსაჯულთა ახალი შემადგენლობა საკადრის გადაწყვეტილებას მიიღებს.

ამის შესახებ ნინო დიდებულიძემ საქალაქო სასამართლოში განაცხადა, სადაც გიორგი ოქროპირიძის საქმეზე ნაფიცი მსაჯულების შერჩევის პროცესი დახურულ კარს მიღმა მიმდინარეობს.

„საკმარისი მტკიცებულებები არსებობს ოქროპირიძის წინააღმდეგ. მისი დანაშაული ნათელია და საორჭოფო აქ არაფერია. იმედია მეორე ეტაპზე ნაფიცი მსაჯულები დადგებიან სწორ გზაზე და მიიღებენ სწორ გადაწყვეტილებას. მკვლელი ქუჩაში არ უნდა დადიოდეს. მან იცის, რომ სამუდამო პატიმრობა ემუქრება და ხელს საკუთარ მეგობარს ადებს. მასაც კი არ ინდობს“, - განაცხადა ნინო დიდებულიძემ.

პროცესი საქალაქო სასამართლოში ამ წუთებში მიმდინარეობს. საბოლოოდ 12 ნაფიცი მსაჯული და 2 სათადარიგო კანდიდატი უნდა შეირჩეს. შეგახსენებთ, რომ ერთი თვის წინ ოქროპირიძის საქმეზე ნაფიცმა მსაჯულებმა გონივრულ ვადაში ვერდიქტი ვერ გამოიტანეს, რის გამოც მოსამართლემ ისინი დაითხოვა.