პროკურატურამ კაბელების საქმეზე გირაოდ 10-10 ათასი ლარი მოითხოვა

სამართალი - 12:37, 19 Jun, 2015

1417

თბილისის საქალაქო სასამართლოში ე.წ კაბელების საქმეზე წინასასამართლო სხდომა იმართება. საბიუჯეტო თანხების გაფლანგვის ბრალდებით დაკავებული თავდაცვის სამინისტროს ყოფილი მაღალჩინოსნების ნუგზარ კაიშაურის, გიზო ღლონტის, დავით წიფურიას, გიორგი ლობჯანიძისა და არჩილ ალავიძისთვის ბრალდების მხარე 10 000-10 000 ლარიანი გირაოს შეფარდებას ითხოვს.

დაცვის მხარე კი ე.წ. კაბელების საქმეზე დაკავებულების ყოველგვარი აღკვეთის ღონისძიების გარეშე დატოვებას მოითხოვს. შუამდგომლობა ადვოკატმა სოსო ბარათაშვილმა სასამართლოს გააცნო.

დაცვის მხარემ ალტერნატივად პარლამენტარების და საზოგადოებისთვის ცნობილი სახეების პირადი თავდებობა წარმოადგინა. მათ შორის არის ყოფილი თავდაცვის მინისტრი გია ყარყარაშვილი, რომელიც სხდომაზე ცოტა ხნის წინ მივიდა.

სასამართლოზე, დღეს გაირკვევა, დააკმაყოფილებს თუ არა მოსამართლე პროკურატურის შუამდგომლობას. საქართველოს მთავარმა პროკურატურამ გუშინ თბილისის საქალაქო სასამართლოს შუამდგომლობით მიმართა, ე.წ. კაბელების სქმეზე დაკავებული პირების მიმართ გამოყენებული პატიმრობა გირაოთი შეიცვალოს.

თავდაცვის სამინისტროს მოქმედი თანამდებობის 5 პირი, 4 მილიონ ლარზე მეტი საბიუჯეტო თანხების გაფლანგვის ბრალდებით, 2014 წლის 28 ოქტომბერს დააკავეს. გამოძიების ინფორმაციით, თავდაცვის სამინისტრომ საიდუმლო შესყიდვა გამოაცხადა, რომელიც ოპტიკურ-ბოჭკოვანი მაგისტრალის გაყვანას შეეხებოდა. სამინისტროს მაღალი თანამდებობის პირებმა კი კომპანია „სილქნეტი“ პრივილეგირებულ მდგომარეობაში ჩააყენეს და მომსახურებაში, რომელიც, პროკურატურის შეფასებით, 2 მილიონი ლარის ღირებულებისაა, „სილქნეტმა“ 6 მილიონი ლარი მიიღო.