შინაგან საქმეთა სამინისტრო ვეფხის თავდასხმის შედეგად ადამიანის გარდაცვალების გამო მწუხარებას გამოთქვამს და საგანგებო განცხადებას ავრცელებს.

შსს-ს განცხადბაში ნათქვამია, რომ მიუხედავად გავრცელებული განცხადებისა, რომლის მიხედვითაც ქალაქის ტერიტორიაზე მტაცებელი ცხოველები აღარ იმყოფებოდნენ, უწყებას სამძებრო სამუშაოები არ შეუწყვეტია.

"ღრმა მწუხარებას გამოვთქვამთ მტაცებლის თავდასხმის შედეგად გარდაცვლილი მოქალაქის გამო. აღნიშნულ ფაქტთან დაკავშირებით გამოძიება დაიწყო.
მიუხედავად გავრცელებული ინფორმაციისა, რომ ცხოველები აღარ არიან ქალაქში, შინაგან საქმეთა სამინისტროს სტიქიის ზონაში პატრულირება არ შეუწყვეტია. არაერთხელ შემოწმდა შენობა, სადაც ვეფხვი თავს დაესხა მოქალაქეს. შსს-ს წარმომადგენლებმა ვერ მოახერხეს შენობაში შესვლა, რადგან ეს შენობა არის გისოსებში და მისი რკინის კარი დაკეტილი იყო. მოქალაქე, რომელმაც გააღო აღნიშნული შენობის კარი და ერთ–ერთი პირველი შევიდა შენობაში, მტაცებელი ცხოველის მსხვერპლი გახდა. მასთან ერთად კიდევ ორი მოქალაქე იმყოფებოდა, რომლებმაც გაქცევა შეძლეს და სამართალდამცველებს შეატყობინეს.
შინაგან საქმეთა სამინისტროს შესაბამისი ქვედანაყოფები ამჟამადაც აგრძელებენ სამძებრო ღონისძიებებს მთელი თბილისის მასშტაბით.
მომხდარზე გამოძიებას აწარმოებს საქართველოს მთავარი პროკურატურა,"-ნათქვამია შს სამინისტროს მიერ გავრცელებულ განცხადებაში.