დავით შერვაშიძემ მარნეულის რაიონში მიმდინარე სამუშაოები მოინახულა

საზოგადოება - 11:47, 24 Feb, 2013

357

ფერმერებთან ერთად, საგაზაფხულო პროგრამის ფარგლებში მარნეულის რაიონში მიმდინარე სამუშაოები მოინახულეს.

როგორც შერვაშიძემ განაცხადა, "სოფლის მეურნეობის სამინისტროს ერთ-ერთ პრიორიტეტს ქვეყანაში საირიგაციო და სადრენაჟო სისტემების ფუნქციონირების გაუმჯობესება წარმოადგენს".

"ქვეყნის მასშტაბით 2013 წელს 50-მდე სარწყავი არხი აღდგება. ქვემო ქართლის რეგიონში საგაზაფხულო პროგრამის ფარგლებში მიმდინარე ხვნის პროცესის გარდა, სარწყავი სისტემების რეაბილიტაციის პროცესიც აქტიურად მიმდინარეობს. გარდაბნის რაიონის ცენტრალურ მაგისტრალზე გაწმენდით-აღდგენითი სამუშაოები უკვე ხორციელდება. აღნიშნულ რაიონში სარწყავი არხების დანალექი გრუნტისგან გაწმენდის შემდეგ 8 ათასი ჰა მიწის ფართობი მოირწყვება", - განაცხადა დავით შერვაშიძემ.

გაერთიანებული სამელიორაციო სისტემების კომპანიის დირექტორის ვაჟა კირტავას განცხადებით, მიმდინარე წელს არხებზე ჩატარებული სარეაბილიტაციო და აღდგენითი სამუშაოების შედეგად, რწყვის სეზონის დაწყებამდე 70 ათასი ჰექტარი სასოფლო-სამეურნეო მიწის ფართობი უზრუნველყოფილი იქნება სარწყავი წყლით.

საგაზაფხულო პროგრამის ფარგლებში, აგროვადების გათვალისწინებით, სამუშაოები ქვემო ქართლის რეგიონის სოფლებიდან დაიწყო. რეგიონში 70 ათასი ბენეფიციარისთვის 24 ათასი ჰექტარი მიწის ფართობი დამუშავდება. ჯამში მთავრობა და სოფლისა და სოფლის მეურნეობის განვითარების ფონდი დაეხმარება 640 000-ზე მეტ მიწის მესაკუთრეს, ვისაც საკუთრებაში 0-დან 5 ჰექტრის ჩათვლით სასოფლო-სამეურნეო დანიშნულების მიწის ნაკვეთი აქვს. მცირემიწიანი ფერმერები სასოფლო-სამეურნეო ბარათის ფორმით მათ სარგებლობაში არსებული მიწის ფართობის კატეგორიის შესაბამის სარგებელს მიიღებენ.