“არ დაგვანახოთ ეგ ბავშვები, თორემ ჩვენს თავზე პასუხს არ ვაგებთ” - მოზარდის თვითმკვლელობის საქმეზე ძიება შეწყდა

სამართალი - 18:39, 13 Jun, 2015

11885

სიღნაღის მუნიციპალიტეტის სოფელ ძველ ანაგაში გარდაცვლილი ბავშვის მშობლების მოთხოვნით, იმ ოჯახმა, რომელსაც ბრალს დებდნენ მოზარდის თვითმკვლელობაში, შვილები ძველი ანაგის სკოლიდან სასწავლებლად ხირსაში გადაიყვანა.

ინფორმაცია speqtri.ge-ს გამგებლის წარმომადგენელმა ძველ ანაგაში ზაზა ბეგიაშვილმაც დაუდასტურა.

– “გარდაცვლილი ბავშვის კლასელი და მისი ძმაც მშობლებმა სხვა სკოლაში გადაიყვანეს. გარდაცვლილის მშობლები ამბობდნენ, არ დაგვანახოთ ეგ ბავშვები, თორემ ჩვენს თავზე პასუხს არ ვაგებთო. პოლიციაც ჩაერია და კონფლიქტის თავიდან ასაცილებლად სხვა სკოლაში გადაყვანა ურჩიეს. ეს ინციდენტიდან 2-3 კვირის შემდეგ მოხდა.”

აღნიშნულ საკითხთან დაკავშირებით სკოლის დირექტორს ნინო ღვედაშვილსაც ვესაუბრეთ.

– “მშობლებმა ასე ჩათვალეს საჭიროდ, რომ ბავშვები სხვა სკოლაში გადაეყვანათ. მათთან საუბარიც მქონდა. ამბობდნენ, რომ ბავშვებისთვისაც და მათი ოჯახისთვისაც უკეთესი იქნებოდა. გარდაცვლილის მშობლებთან შეკამათებაც ჰქონდათ. ამ ბავშვებთან სამინისტროს ფსიქოლოგებმაიმუშავეს. რაც შეეხება გარდაცვლილის ძმას, ის მეოთხე კლასშია, განათლების სამინისტროს ფსიქოლოგებმა დახმარება მასაც შესთავაზეს, მაგრამ ბავშვმა არ მოისურვა.”

ჯანდაცვის სამინისტროში განმარტეს, რომ გარდაცვლილი ბავშვის ოჯახში სოციალური მუშაკი რამდენჯერმე იმყოფებოდა და ოჯახის საჭიროებები შეისწავლა.

სიღნაღის რაიონის სოფელ ძველ ანაგაში 11 წლის მოზარდ მა თავი ჩამოიხრჩო. თვითმკვლელობის მოტივად სკოლაში მოსწავლეებს შორის მომხდარი ჩხუბი სახელდება.

ადგილობრივების ინფორმაციით, მოზარდს უთხრეს,, რომ ის ნაშვილები იყო. ის სკოლიდან სახლში დაბრუნების შემდეგ გაუჩინარდა. მოგვიანებით კი ბებიამ და ძმამ სახლის მიმდებარე სათავსოში გარდაცვლილი იპოვეს.

სკოლის დირექტორის განცხადებით, მოსწავლეებს შორის კონფლიქტი დილის საათებში დაიწყო.

მისი თქმით, მეხუთე და მესამე კლასის მოსწავლეებს შორის კონფლიქტი, წინა საღამოს მშობლებს შორის მომხდარი დაპირისპირების გაგრძელება იყო.

საქმე სსკ-ის 115-ე მუხლით იყო აღძრული, რაც თვითმკვლელობამდე მიყვანას გულისხმობს, თუმცა დანაშაულის ნიშნების არარსებობის გამო შეწყდა.