ე.წ. კორტების სპეცოპერაციის საქმეზე ბრალდებული კახა ნაკანის ადვოკატი კახა შონია ეჭვობს, რომ 7 სპეცრაზმელის ერთ საკანში მოთავსება მისი დაცვის ქვეშ მყოფის წინააღმდეგ არის მიმართული.

როგორც „ნიუპოსტს“ შონიამ განუცხადა, მას აქვს ინფორმაცია, რომ ყოფილი სპეცრაზმელები ციხეში პრივილეგირებულ მდგომარეობაში იმყოფებიან, ხოლო ნაკანი დაკავებიდან დღემდე სამარტოო საკანშია მოთავსებული.

ადვოკატის ინფორმაციით, ამის მიზეზი არის ის, რომ 7 ყოფილი სპეცრაზმელისგან ნაკანის საწინააღმდეგო ჩვენების მიღება სურთ.

„კანონში წერია, რომ ერთი საქმეზე ბრალდებულების ერთ საკანში მოთავსება არაფრით არ შეიძლება. მათი ერთმანეთთან კონტაქტი და კავშირი არ შეიძლება. როგორც ვიცი, იყო შემთხვევაც როდესაც ადვოკატს შესახვედრად 4 ერთად გამოუყვანეს. ესეც კანონდარღვევაა. რაც შეეხება კახა ნაკანს, ის დღიდან დაკავებისა მარტოა საკანში. ის არ არის პრივილეგირებულ მდგომარეობაში. სამარტოო საკანშია. სწორედ ამიტომ სცადა თვითმკვლელობა. მას არ აქვს არც რადიო და არც ტელევიზორი. მასზე ამ გზით ფსიქოლოგიური ზეწოლა ხორციელდება. ხოლო სპეცრაზმელების პრივილეგირებულ მდგომარეობაში ჩაყენება ემსახურება ერთადერთ მიზანს და ეს გახლავთ ის მიზანი, რომ პროკურატურამ მათგან სასურველი ჩვენება მიიღოს. ეს პირდაპირ შემიძლია გითხრათ, რომ ასეა. მას ჰპირდებიან საპროცესო შეთანხმებას თუ რას არ ვიცი, მაგრამ სასურველი ჩვენება სურთ. როგორც ვიცი ეს პირები ჩვენების მიცემისგან თავს იკავებენ. საბოლოო შეიძლება ითქვას, რომ ეს ყველაფერი ნაკანის წინააღმდეგ ხდება“, - განაცხადა შონიამ.

შეგახსენებთ, სასჯელაღსრულების სამინისტროს ინფორმაციით, ე.წ. კორტების სპეცოპერაციის საქმეზე ბრალდებული სპეცრაზმელები ერთ საკანში არიან გადაყვანილი. რაც შეეხება მოტივს, თუ რატომ მოხდა მათი ერთ საკანში მოთავსება, ჯერჯერობით უცნობია.