ევროპარლამენტი მიიჩნევს, რომ რუსეთის ფედერაცია ევროკავშირის სტრატეგიულ პარტნიორად აღარ განიხილება.

ამის შესახებ ევროპარლამენტის მიერ მიღებულ რეზოლუციაშია ნათქვამი.

„რუსეთის მიერ ყირიმსა და აღმოსავლეთ უკრაინაში განხორციელებული აგრესიის გამო, რუსეთი ვეღარ ჩაითვლება ევროკავშირის სტრატეგიულ პარტნიორად, რადგან პარტნიორობა ურთიერთნდობას, საერთაშრისო სამართლისა და დემოკრატიის პრინციპებს, ასევე სახელმწიფოების სუვერენიტეტსა და არჩევანის თავისუფლებას უნდა ეფუძნებოდეს, რასაც რუსეთი არღვევს“ - ნათქვამია რეზოლუციაში.

რეზოლუცია ასევე მოუწოდებს ევროკავშირს შეიმუშავოს რუსეთთან და აღმოსავლეთ ევროპელ პარტნიორებთან ურთიერთობის სამომავლო სტრატეგია. ევროპარლამენტი აღნიშნავს, რომ რუსეთის პირდაპირი და ირიბი მონაწილეობა უკრაინის შეიარაღებულ კონფლიქტში, ასევე ყირიმის ანექსია და საქართველოს ტერიტორიული მთლიანობის დარღვევა, მეზობელ ქვეყნებში ეკონომიკური და პოლიტიკური დესტაბილიზაცია დემოკრატიის ფუნდამენტურ პრინციპებს არღვევს, ამიტომას რუსეთთან ურთიერთობის საკითხი უნდა გადაიხედოს.