უბედური შემთხვევა ნუცუბიძის ქუჩაზე დაახლოებით ღამის სამ საათზე მოხდა. სოციალურ ქსელებში თავდაპირველად გავრცელებული ინფორმაცია მკვლელობის შესახებ არ დადასტურდა.

თვითმხილველთა თქმით, გარდაცვლილი მამაკაცი სტუმრად იმყოფებოდა და მასთან ერთად იყვნენ ყოფილი გუბერნატორი ლადო ვარძელაშვილი, მისი მეუღლე ირინა ონაშვილი და სხვა პირები. "ნიუპოსტის" წყაროს ცნობით, შემთხვევითი გასროლა მაშინ მოხდა, როცა სტუმრები ერთ-ერთი იქ მყოფთაგანის ცეცხლსასროლ იარაღს ათვალიერებდნენ.

შემთხვევის ადგილზე სასწრაფო დახმარების ბრიგადები და საპატრულო პოლიციის ეკიპაჟები გავიდნენ. თვითმხილველთა თქმით, დაჭრილის ჰოსპიტალიზების მიზნით სასწრაფო დახმარების მანქანას თან გაჰყვნენ ლადო ვარძელაშვილი და მისი მეუღლე ირინა ონაშვილი, თუმცა, დაჭრილი საავადმყოფოში მიყვანამდე გარდაიცვალა.

გარდაცვლილი მამაკაცის ვინაობა "ნიუპოსტისთვის" ცნობილი არ არის. მომხდართან დაკავშირებით აღძრულია სისხლის სამართლის საქმე.