თბილისის საქალაქო სასამართლოში, სადაც ლაშა მახარაძის მკვლელობის საქმე მიმდინარეობს, ბრალდებულმა გიორგი ოქროპირიძემ დასკვნითი სიტყვა წარმოსთქვა.

მან კიდევ ერთხელ უარყო ბრალდება და განაცხადა, რომ ლაშა მახარაძე ვლადიმერ ბერძენიშვილმა მოკლა.

ბრალდებულის განმარტებით, მას კონფლიქტი მახარაძესთან არ ჰქონია და შესაბამისად მკვლელობის ჩადენის მოტივიც არ არსებობდა.

„ჩემი ოცნება იყო, რომ ციხიდან გავაღწიო და ცხოვრება ავიწყოთქო. ძლივს გამოვაღწიე... და ეხლა ცხოვრება მწყურია. ჩემს ცხოვრებას აზრი არ აქვს. ლაშა მახარაძესთან შეხება არ მქონია. მაგაზე ცუდი არც კი გამიფიქრია. მცხვენია, რომ ამდენს ერთი და იგივეს ვლაპარაკობ... იარაღი არ მდებია და რითი უნდა მომეკლა? პირადულზე გავედი გარეთ შორტებით. საერთოდ არ ვიხედებოდი გარეთ.. ბებიაჩემს ვუვლიდი“, - განაცხადა ოქროპირიძემ.

ამ წუთებში ნაფიცმსაჯულთა კოლეგია გადაწყვეტილების მისაღებად არის გასული. სწორედ მათ უნდა გამოიტანონ ვერდიქტი გიორგი ოქროპირიძესთან დაკავშირებით. რაც შეეხება ბრალდებული პატიმრობის ვადას, ამას უკვე მოსამართლე გადაწყვეტს.

შეგახსენებთ, ლაშა მახარაძე გასული წლის სექტემბერში მოკლეს. საქმეზე დაკავებულია გიორგი ოქროპირიძე, რომელიც ბრალს არ აღიარებს.