ამერიკის შეერთებული შტატების მოთხოვნით, ინტერპოლმა ფიფას 6 მაღალჩინოსანზე წითელი ცირკულარით ძებნა გამოაცხადა.

გავრცელებული ინფორმაციით, გამოძიება მიმდინარეობს იოზეფ ბლატერის წინააღმდეგაც, რომელმაც ფიფას პრეზიდენტის პოსტზე ხელახალი არჩევიდან მეოთხე დღეს თანამდებობა დატოვა.

ორგანიზაციამ ახალი ხელმძღვანელის ასარჩევად რიგგარეშე კონგრესი უნდა მოიწვიოს. მედიაში რამდენიმე რამდენიმე კანდიდატის ვინაობა სახელდება, მათ შორის არიან იორდანიის პრინცი ალი ბინ ალ ჰუსეინი, მიშელ პლატინი, ლუიშ ფიგუ და დიეგო მარადონაც.

შეგახსენებთ, 27 მაისს ფიფას ოფიციალური პირები შვეიცარიის პოლიციამ ციურიხის ერთ-ერთ სასტუმროში თაღლითობისა და ფულის გათეთრების ბრალდებით დააკავა. დაკავებულ მაღალჩინოსნებს შორის არიან ორგანიზაციის ვიცე-პრეზიდენტები - ჯეფრი ვები და ეუხენიო ფიგრედო. ასევე კოსტა რიკას ფეხბურთის ფედერაციის ხელმძღვანელი, ედუარდო ლი და ბრაზილიის ფეხბურთის ფედერაციის პრეზიდენტი, ხოსე მარია მარინი.

გავრცელებული ინფორმაციით, მათ 1990-იან წლებში ლათინურ ამერიკაში ფეხბურთის ჩემპიონატებისთვის 100 მლნ დოლარის ოდენობის ქრთამი აიღეს. გამოძიება 2018-2022 წლების ჩემპიონატების ჩატარების ადგილების არჩევის საკითხითაც დაინტერესდა. შეგახსენებთ, ჩემპიონატების ჩატარების ადგილად რუსეთი და ყატარი შეირჩა.