ღონისძიებას ცესკოს თავმჯდომარე ზურაბ ხარატიშვილი, საქართველოში ევროკავშირის დელეგაციის ხელმძღვანელი ფილიპ დიმიტროვი და საპარლამენტო სწავლებების საერთაშორისო ცენტრის ხელმძღვანელი მეთ გოქჰოლი გახსნიან. ღონისძიება სასტუმრო ,,ჰოლიდეი ინ"-ში მიმდინარეობს.

ცენტრალური საარჩევნო კომისია აღმოსავლეთ ევროპის და ცენტრალური აზიის საარჩევნო ადმინისტრაციებს მასპინძლობს. 20-21 თებერვალს სხვადასხვა ქვეყნების საარჩევნო ადმინისტრაციების წარმომადგენლები, საერთაშორისო ორგანიზაციებთან ერთად მესამე ყოველწლიურ კონფერენციას დაესწრებიან.

რიგით მესამე შეხვედრაში ეუთოს ქვეყნების გარდა პირველად მიიღებენ მონაწილეობას საარჩევნო ადმინისტრაციების წარმომადგენლები ისრაელიდან, ნეპალიდან, ერაყიდან და ინდონეზიიდან.

კონფერენციის მთავარი თემაა - ,,კონფლიქტების მართვა საარჩევნო პროცესებში".

წელს ცენტრალური საარჩევნო კომისია კონფერენციას საპარლამენტო სწავლებების საერთაშორისო ცენტრთან ერთად მართავს. (ICPS - ორგანიზაცია უკვე წლებია ხელს უწყობს ეფექტური პოლიტიკის წარმოებას და მართვას სხვადასხვა ქვეყნების საკანონმდებლო ორგანოებსა და მთავრობებს შორის ურთიერთქმედების ხელშეწყობით. ICPS-ი არის არაერთი საერთაშორისო სწავლებისა და ტრენინგების ორგანიზატორი საარჩევნო საკითხებში, რითაც ასევე მუდმივად უწყობს ხელს დემოკრატიის განვითარებას).

სხვადასხვა საარჩევნო ადმინსიტრაციების წარმომდგნლები საკუთარ პრეზენტაციებს და ხედვას წარმოადგენენ; ხოლო საერთაშორისო ორგანიზაციები: ,,სმარტმატიკი" (Smartmatic), ,,ქროს მეჩ ტექნოლოჯის" (Cross Match Technologies), ,,დომინიონ ვოუთინგ სისთემს"-ი (Dominion Voting Systems), ,,სკიტლენდ გილატ სატელაიტ ნეთვორქსი" (Scytland Gilat Satellite Networks) კონფერენციის მონაწილეებს გააცნობენ ოპტიკურ სკანერებს, ელექტრონული ხმის მიცემისთვის საჭირო სპეციალურ მანქანებს და სხვა საარჩევნო ინოვაციურ ტექნოლოგიებს.

საქართველოს საარჩევნო ადმინისტრაციას მიაჩნია, რომ მსგავსი შეხვედრები ხელს უწყობს ურთიერთგამოცდილების გაზიარებას, ერთობლივი მეთოდების შემუშავებას საარჩევნო გარემოს გაუმჯობესების მიზნით და დემოკრატიის განვითარების ხელშეწყობას.
ღონისძიებაში მონაწილე ქვეყნებისა და საერთაშორისო ორგანიზაციების სრული ჩამონათვალი:
ლიტვა, ლატვია, მოლდოვა, აზერბაიჯანი, ბელორუსია, ბოსნია-ჰერცეგოვინა, ყაზახეთი, ყირგიზეთი, რუმინეთი, უკრაინა, ისრაელი, ნეპალი, ერაყი, ინდონეზია, დიდი ბრიტანეთი, აშშ, ესპანეთი.

ორდღიან შეხვედრებში ჩართული არიან საერთაშორისო ორგანიზაციები:

ევროპის საარჩევნო მოხელეთა ასოციაცია (ACEEEO), საპარლამენტო სწავლებების საერთაშორისო ცენტრი (ICPS), საარჩევნო მხარდაჭერის ევროპული ცენტრი ECES), ეუთოს დემოკრატიული ინსტიტუტებისა და ადამიანის უფლებათა ოფისი (OSCE/ODIHR), აშშ-ს საერთაშორისო განვითარების სააგენტო (USAID), საარჩევნო სისტემების საერთაშორისო ფონდი (IFES), საერთაშორისო რესპუბლიკური ინსტიტუტი (IRI), ეროვნული დემოკრატიული ინსტიტუტი (NDI), გაერთიანებული ერების განვითარების პროგრამა (UDNP), ევროკავშირის დელეგაცია, ევროსაბჭო, ნიდერლანდების ინსტიტუტი მრავალპარტიული დემოკრატიისთვის (NIMD), საარჩევნო ფსიქოლოგიის საერთაშორისო ცენტრი, ასევე კოლორადოს (აშშ) უნივერსიტეტის და ესპანეთის როვირა ი ვირგილის სახელობის უნივერსიტეტის ექსპერტები.

საარჩევნო ტექნოლოგიებზე ორიენტირებული კომპანიები:

,,სმარტმატიკი"" (Smartmatic), ,,ქროს მეჩ ტექნოლოჯის" (Cross Match Technologies), ,,დომინიონ ვოუთინგ სისთემს"-ი (Dominion Voting Systems), ,,სკიტლენდ გილატ სატელაიტ ნეთვორქსი" (Scytland Gilat Satellite Networks).