რატომ დაუპირისპირდნენ სასამართლოზე ერთმანეთს სოსო რობაქიძე და ადვოკატი

სამართალი - 20:49, 29 May, 2015

2103

ბუტა რობაქიძის საქმეზე მიმდინარე სასამართლო პროცესი მოკლულის მამამ სოსო რობაქიძემ პროტესტის ნიშნად დატოვა. დარბაზიდან გამოვლის შემდეგ სოსო რობაქიძემ ჟურნალისტებთან კომენტარი გააკეთა და განაცხადა, რომ ის ერთ-ერთი ბრალდებულის, ზურაბ მიქაძის ადვოკატის, კობა კობახიძის შეკითხვებმა გააღიზიანა, რომელსაც ის მოწმეს უსვამდა.

როგორც რობაქიძემ განაცხადა, მას რამდენიმე ხნის წინ ადვოკატი კობა კობახიძე შეხვდა პროკურატურაში და უთხრა, რომ იცის, რომ ბრალდებულები არიან „ნაძირლები“, სხვა გზა არ აქვს და მათ იცავს.

„გამაღიზიანა ზურაბ მიქაძის ადვოკატის შეკითხვებმა, რომლებსაც უსვამდა მოწმეს. რამდენიმე ხნის წინ პროკურატურაში შემხვდა ადვოკატი კობა კობახიძე, მან მითხრა რომ იცის, საქმეში ბრალდებულები არიან ნაძირლები, მაგრამ სხვა გზა არ აქვს, რადგან ზურაბ მიქაძის შვილი მუშაობს ჩემთან ადვოკატადო. გამაღიზიანა მისმა შეკითხვებმა და დავტოვე დარბაზი“, - განაცხადა სოსო რობაქიძემ.

რობაქიძეს ადვოკატი კობა კობახიძე გამოეხმაურა და მისი მისამართით გამოთქმული ბრალდებები უარყო.

„რობაქიძემ რაც განაცხადა, რომ თითქოს მე ვიცი, ესენი რა ნაძირლებიც არიან და ვიცავ იმიტომ, რომ ზურაბ მიქაძის შვილი არის ჩემი თანაშემწე ჩემ საადვოკატო ბიუროში, ასეთი ფორმულირება სწორი არ არის. მე ეს არასდროს განმიცხადებია. მთავარ პროკურატურაში სოსო რობაქიძე საერთოდ არ მინახავს, პირიქით, მე დარწმუნებული ვარ, მიქაძის უდანაშაულობაში. მე სხვაზე არ მაქვს საქმე. მიქაძემ მე ადამიანურად დამარწმუნა და მჯერა მისი. მე თუ ჩემი კლიენტის არ ვიწამე, ისე საქმეზე არ გავალ“, -განაცხადა ადვოკატმა.
რაც შეეხება, ბუტა რობაქიძის საქმეს, დღევანდელ პროცესზე დაიკითხა ბუტა რობაქიძის მეგობარი, დაზარალებული ლევან დანგაძე, რომელიც სპეცოპერაციის დროს ბუტა რობაქიძესთან და მის მეგობრებთან ერთად ავტომანქანაში იმყოფებოდა.

როგორც ადვოკატი აცხადებს, მოწმემ დღეს იმ გარემოებებზე ისაუბრა, რაც ადრე არ უთქვამს.

„დანგაძეს ადრე ფიცის ქვეშ ბაშალეიშვილის სასამართლოზე მოწმედ დაკითხვისას არ უხსენებია ზურაბ მიქაძე და დღეს, ასევე ფიცის ქვეშ განაცხადა, თითქოს, ზურაბ მიქაძემ გასცა განკარგულება, რომ გაეძეძგათ იარაღით შემთხვევის ადგილი“, -განაცხადა ადვოკატმა.