ლაშა მახარაძის მკვლელობაში ბრალდებული, გიორგი ოქროპირიძე სკანდალურ განცხადებას აკეთებს. „ოქრიკა“ ჩვენებაში ამბობს, რომ ყოფილი შს მინისტრი ალექსანდრე ჭიკაიძეს მას სთხოვდა, რომ მისი პირადი ზონდერი ყოფილიყო.

„მან განაცხადა, რომ პირადად ალექსანდრე ჭიკაიძემ ავტომობილში ესაუბრა და შესთავაზა, რომ ყოფილი მისი ზონდერი, რაც საღ აზრს არის მოკლებული. მან გააჟერა ისეთი ფატქები, რაც გამოგონილია და არანაირი მტკიცებულებით არ დასტურდება. მან თქვა, რომ 2014 წელს საკუთარ სახლთან იმყოფებოდა და მახარაძის მკვლელობის შესახებ „ბერძენასგან“ გაიგო“ - აცხადებს საქმის პროკურორი ნიკოლოზ ნინიძე.

გიორგი ოქროპირიძემ ჩვენება ნაფიცმსაჯულებს მისცა. მან ბრალი უარყო და ხელი ვლადიმერ ბერძენიშვილს დაადო, რომელსაც ამავე საქმეში დანაშაულის შეუტყობინებლობა ედება ბრალად.

შეგახსენებთ, ვაკეში მკვლელობა გასულ წელს, აბაშიძის ქუჩაზე, 2 სექტემბერს მოხდა. გამოძიების ინფორმაციით გიორგი ოქროპირიძემ ცეცხლსასროლი იარაღიდან გასროლით რამდენიმე ჭრილობა მიაყენა ლაშა მახარაძეს, რომელიც საავადმყოფოში მიყვანისთანავე გარდაიცვალა.

ოქროპირიძე რამდენიმე დღეში ოკუპირებული ცხინვალის რეგიონის ტერიტორიაზე დააკავეს.