FIFA-ს სკანდალთან დაკავშირებით რუსეთის სპორტის მინისტრს დაკითხავენ

მსოფლიო - 14:52, 28 May, 2015

1127

რუსეთის სპორტის მინისტრს, ვიტალი მუტკოს ფიფა-ს ხელმძღვანელების წინააღმდეგ დაწყებული გამოძიების ფარგლებში დაკითხავენ. ამის შესახებ რუსული მედია იტყობინება.

დაკითხვა დღეს შვეიცარიის პროკურატურაში გაიმართება.

„ფიფას“ 7 ოფიციალური პირები შვეიცარიის პოლიციამ გუშინ, ციურიხის ერთ-ერთ სასტუმროში თაღლითობისა და ფულის გათეთრების ბრალდებით დააკავა. დაკავებულ მაღალჩინოსნებს შორის არიან ორგანიზაციის ვიცე-პრეზიდენტები - ჯეფრი ვები და ეუხენიო ფიგრედო. ასევე კოსტა რიკას ფეხბურთოს ფედერაციის ხელმძღვანელი, ედუარდო ლი და ბრაზილიის ფეხბურთის ფედერაციის პრეზიდენტი, ხოსე მარია მარინი.

გავრცელებული ინფორმაციით, მათ 1990-იან წლებში ლათინურ ამერიკაში ფეხბურთის ჩემპიონატებისთვის 100 მლნ დოლარის ოდენობის ქრთამი აიღეს. გამოძიება 2018-2022 წლების ჩემპიონატების ჩატარების ადგილების არჩევის საკითხითაც დაინტერესდა. შეგახსენებთ, ჩემპიონატების ჩატარების ადგილად რუსეთი და ყატარი შეირჩა.

The Wall Street Journal-ის ინფორმაციით, დაკავებულების ექსტრადირება აშშ-ში მოხდება.

29 მაისს ციურიხში „ფიფას“ ყოველწლიური შეხვედრაა დაგეგმილი, რომელზეც ორგანიზაციის პრეზიდენტის არჩევნები უნდა ჩატარდეს.

აღნიშნულ ფაქტს რუსეთის პრეზიდენტიც გამოეხმაურა. ვლადიმერ პუტინის თქმით, აშშ-ს ზეპ ბლატერის ფიფა-ს პრეზიდენტად ხელახლა არჩევა არ სურს და ფიფა-ს პრეზიდენტის არჩევნებია ჩაშლას ცდილობს. მისივე თქმით, ფიფა-ს ხელმძღვანელი პირების დაკავება ამერიკული მხარის მოთხოვნით განხორციელდა.