28 მაისს, ხუთშაბათს, 13.30 საათზე, საზოგადოებრივი მოძრაობა „ალტერნატიული მერიის“ საინიციატივო ჯგუფი არალეგალიზებულ ბინათმოსარგებლეებთან, იპოთეკური ხელშეკრულებებით დაზარალებულ და ე.წ. „ატსტუპნიკ“ თბილისელებთან ერთად ქალაქის მერიასთან მართავს საპროტესტო აქციას (შარტავას ქ. 7).

„ალტერნატიული მერია“ აპროტესტებს თბილისის მერიის უმოქმედობას ქალაქში ბინათსარგებლობასთან დაკავშირებულ საკითხზე და მერიისაგან მოითხოვს დაინტერესებულ მხარეებთან ერთობლივი ჯგუფის შექმნას, რომელიც იმუშავებს ამ კატეგორიის თბილისელების პრობლემების მოგვარებაზე.

აქციაზე არალეგალიზებული ბინათმოსარგებლეების 65 ოჯახი, რომლებიც უკვე 13 წელია ცხოვრობს ე.წ. „მეტრომშენის“ ბინებში თბილისის ზღვის მიმდებარე ტერიტორიაზე, მოითხოვს, რომ მერიამ შეწყვიტოს სასამართლო დავა მათ მიმართ გამოსახლების მოთხოვნით და დაუკანონდეთ არსებული საცხოვრებელი ფართები.

ამასთან იპოთეკური ხელშეკრულებებით დაზარალებულები და ე.წ. „ატსტუპნიკები“ქ.თბილისის მერისაგან მოითხოვენ პასუხს უშუალოდ ბატონი ნარმანიას ერთი თვისწინანდელ დაპირებაზე, რომ ის აღძრავდა შუამდგომლობას ქვეყნის ხელისუფლებასთან მათი პრობლემების მოსაგვარებლად.

„ალტერნატიული მერია“ წარმოადგენს საზოგადოებრივ მოძრაობას, რომელშიც გაერთიანებულნი არიან თბილისელი მოქალაქეები, ასევე თბილისის პრობლემატიკით დაინტერესებული საზოგადოებრივი და პოლიტიკური ორგანიზაციები. „ალტერნატიული მერიის“ მიზანია დაინტერესებულ პირებთან და ინტერესთა ჯგუფებთან ერთად ქალაქის პრობლემებზე ფართო საზოგადოებრივი ყურადღების მიპყრობა და ალტერნატიული გადაწყვეტილებების შეთავაზების გზით ეფექტური საზოგადოებრივი მონიტორინგის განხორციელება თბილისის მერიის საქმიანობაზე.

საკონტაქტო პირები: ალექსანდრე ამზაშვილი 551 39 66 04

ზურაბ ხარატიშვილი 577 99 88 58