ქურდულ სამყაროსთან კავშირში ბრალდებული ათი პირიდან ორი გაათავისუფლეს

სამართალი - 15:29, 27 May, 2015

3461

ქურდულ სამყაროსთან კავშირის, ნარკოდანაშაულისა და იარაღის უკანონო შენახვის ბრალდებით დაკავებული 10 პირის მიმართ ზუგდიდის რაიონულმა სასამართლომ განაჩენი დღეს გამოაცხადა. მოსამართლე შოთა ბიჭიას გადაწყვეტილებით, ათი პირიდან ორის, ავაზი უბილავასა და დავით ქუხილავას მიმართ სრულად გამამართლებელი განაჩენი დადგა და ისინი სასამართლო დარბაზიდან გაათავისუფლეს, გიორგი რატიანს კი მოეხსნა ქურდულ სამყაროსთან კავშირის ბრალდება და 2 წლიანი პატიმრობა მიესაჯა იარაღის უკანონო შენახვისთვის. როგორც ადვოკატები აცხადებენ, დანარჩენი შვიდი ბრალდებულის მიმართ გამამტყუნებელი გადაწყვეტილება გამოიტანა სასამართლომ და ისინი პატიმრობაში დატოვა. მათ 5 და 7 წლიანი პატიმრობა მიესაჯათ. სასამართლოს ეს გადაწყვეტილება გააპროტესტეს დღეს პატიმრობა მისჯილების ახლობლებმა. მათი განცხადებით, მოსამართლემ „პოლიციელების ცრუ ბრალდებების“ საფუძვეზე უკანონო გადაწყვეტილება მიიღო. საპირისპიროს აცხადებენ ადვოკატები, მათ ჟურნალისტებს უთხრეს რომ სასამართლო მიუკერძოებელი და ობიექტური იყო. აღნიშნული პროცესი ზუგდიდის რაიონულ სასამართლოში უკვე 8 თვეა განიხილება.

10 სექტემბერს დაკავებულთა მშობლებმა საპროტესტო აქცია არერთხელ გამართეს ზუგდიდში. მათი განცხადებით, სასამართლო პროცესზე პროკურატურას „ცრუ მოწმეები“ ჰყავს წარმოფგენილი. შსს-ს სამეგრელო-ზემო სვანეთის სამხარეო მთავარი სამმართველოს და ცენტრალური კრიმინალური პოლიციის დეპარტამენტის თანამშრომლებმა ფოთში, წალენჯიხაში, ზუგდიდში, სენაკში, თბილისსა და გორში ერთდროულად ჩატარებული ოპერატიულ-სამძებრო და საგამოძიებო ღონისძიებების შედეგად ქურდული სამყაროს წევრობის ბრალდებით 10 პირი გასული წლის სექტემბერში დააკავა. გამოძიებამ დაადგინა, რომ დაკავებულები ქურდულ სამყაროს აღიარებენ, სხვადასხვა სარგებლის მიღების მიზნით, ქურდული კანონების შესაბამისად, სპეციალური წესების დაცვით მოქმედებდნენ და მიზანმიმართულად ცდილობდნენ ქურდული სამყაროს ინტერესების საზოგადოებაში დანერგვასა და განმტკიცებას. გამოძიება ქურდული სამყაროს წევრობის ფაქტზე მიმდინარეობს (საქართველოს სსკ-ის 223-ე პრიმა მუხლის 1-ლი ნაწილით).